Առողջապահության համաշխարհային կազմակերպության (ԱՀԿ) տվյալներով 2022 թվականի սկզբից 50 երկրներում գրանցվել է կապիկի ծաղիկի լաբորատոր հաստատված 3413 դեպք և մահվան մեկ դեպք։ Այս մասին ասվում է երեքշաբթի Ժնևում հրապարակված ԱՀԿ տեղեկագրում, գրում է ՏԱՍՍ-ը։

«2022 թվականի հունվարի 1-ից հունիսի 22-ն ընկած ժամանակահատվածում ԱՀԿ-ն ստացել է հաղորդագրությունների  կապիկի ծաղիկի 3413 դեպքի և մեկ մահվան դեպքի մասին 50 երկրներից»,- նշել են կազմակերպությունից։ Նախորդ տեղեկագրի հրապարակումից ի վեր՝ հունիսի 17-ին, ութ երկրներում հայտնաբերվել է 1310 նոր վարակ:

Կապիկի ծաղիկի դեպքերի մեծ մասը (86%) հանդիպում է Եվրոպական տարածաշրջանում։ Դրան հաջորդում են Ամերիկան (11%), Աֆրիկան (2%), Արևելյան Միջերկրական երկրները (1%-ից պակաս) և Ասիա-Խաղաղօվկիանոսյան տարածաշրջանտ (1%-ից պակաս): Երկրներից ամենաբարձր հիվանդացությունը այժմ Մեծ Բրիտանիայում է, որտեղ 793 մարդ վարակվել է կապիկի ծաղիկով, ինչպես նաև Գերմանիայում (521), Իսպանիայում (520), Պորտուգալիայում (317), Ֆրանսիայում (277), Նիդեռլանդներում (167) և ԱՄՆ-ում (142): Մնացած 43 նահանգներում և տարածքներում դեպքերի թիվը չի գերազանցում 100-ը։ Առայժմ միակ մահացու ելքը գրանցվել է Նիգերիայում։

Կապիկի ծաղիկը կենդանիներից մարդկանց փոխանցվող, հազվադեպ հանդիպող, վիրուսային ծագման հիվանդություն է, որը հիմնականում արձանագրվում է Կենտրոնական և Արևմտյան Աֆրիկայի հեռավոր շրջաններում: Վիրուսը մարդուն փոխանցվում է հիմնականում վայրի կենդանիներից, ինչպիսիք են՝ կրծողները և պրիմատները (շիմպանզե, գորիլա, օրանգուտանգ և այլն):

Հիվանդության ախտանիշները ներառում են ջերմություն, գլխացավ, մկանային ցավ, մեջքի ցավ, այտուցված ավշային հանգույցներ, դող և հոգնածություն: