Ֆեյսբուքի հայկական տիրույթում որոշ օգտատերեր, նպաստելով ադրբեջանական քարոզչամեքենայի կողմից կեղծ տեղեկության տարածմանը, գրում են, թե իբր վաղը՝ դեկտեմբերի 18-ին, Զանգեզուրի շրջանից 13 գյուղեր հանձնվելու են Ադրբեջանին։ Շրջանառում են Կաղնուտ, Դավիթ Բեկ, Ուջանիս, Եղվարդ, Ագարակ, Ներքին Հանդ, Ծավ և մի շարք այլ համայնքների անուններ։
ՀՀ վարչապետի աշխատակազմի «Հանրային կապերի և տեղեկատվության կենտրոն» ՊՈԱԿ-ի «Տեղեկատվության ստուգման կենտրոն» նախագիծը հայտնում է, որ տեղեկությունը չի համապատասխանում իրականությանը։ Հիշյալ համայնքները եղել են և շարունակելու են լինել Հայաստանի Հանրապետության միջազգայնորեն ճանաչված տարածքում։ ՀՀ պետական սահմանից որևէ համայնք չի անցնելու հակառակորդին։
Հարկ է նշել նաև, որ նոյեմբերի 9-ին Հայաստանի, Ռուսաստանի և Ադրբեջանի կողմից ստորագրված հրադադարի եռակողմ հայտարարությամբ ևս նման դրույթ սահմանված չէ։
Հայկական մամուլում և սոցցանցերում այսօր երեք հայ գերիների մասին մի տեսանյութ տարածվեց, որում ադրբեջանցի զինվորները խոշտանգում և ստիպում էին գերեվարված քաղաքացիական անձանց ադրբեջանահաճո տեքստեր ասել։ Տարածվող տեսանյութին կից նշվում էր, թե վերջիններս գերեվարվել են Գորիս-Կապան ճանապարհին։
«Տեղեկատվության ստուգման կենտրոնին» հաջողվեց անձամբ կապ հաստատել գերեվարված քաղաքացիական անձանց՝ Անդրանիկ Սարգսյանի, Խաչիկ Գրիգորյանի և Արման Թովմասյանի հետ (անունները հրապարակվել են տղաների համաձայնությամբ)։ Վերջիններս նշեցին, որ տեսանյութը հին է և, որ իրենք այժմ միասին գտնվում են Հայաստանում։ Քաղաքացիները եղել են դեկտեմբերի 14-ին՝ ռուս խաղաղապահների միջնորդությամբ իրականացված գերիների փոխանակման գործընթացի շրջանակում Հայաստան վերադարձված 44 գերիների շարքերում։ Նրանց անունները առկա էին հրապարակված ցուցակներում։
