Վարչապետ Նիկոլ Փաշինյանը այսօր ֆեյսբուքյան ուղիղ եթերի ընթացքում տեղեկացրեց, որ իրագործվում են նոյեմբերի 18-ին հրապարակված ճանապարհային քարտեզի դրույթները։
«ԵԱՀԿ Մինսկի խմբի համանախագահները երկարատև դադարից հետո այցելել են տարածաշրջան։ Մինսկի խմբի ձևաչափում բանակցությունների վերականգնումը ճանապարհային քարտեզի առաջին կետն էր։ Տասնյակ հազարավոր արցախցիներ արդեն իսկ վերադարձել են իրենց բնակավայրեր, իրականացվում են բազմաթիվ սոցիալական աջակցության ծրագրեր՝ նրանց օր առաջ բնականոն կյանքի վերադարձնելու համար։ Կառավարությունը որոշում է կայացրել Հայաստանում և Արցախում վնասված տների սեփականատերերին աջակցություն ցուցաբերելու մասին, պատերազմին մասնակից ուսանողների և պատերազմին մասնակցած մեր եղբայրների ու քույրերի ընտանիքի անդամ ուսանողների ընթացիկ կիսամյակի ուսման վարձը ամբողջությամբ կփոխհատուցվի: Կառավարությունը որոշում է կայացրել վերականգնողական բուժման կարիք ունեցող մեր զինվորների բուժման ծախսերը փոխհատուցելու նոր կարգի մասին, Արցախում և Հայաստանում հյուրընկալ ընտանիքներին վճարումներ իրականացնելու մասին, որոշումը էական նշանակություն կունենա առանց բնակարանի մնացած անձնանց կացության հարցերը լուծելու համար»։
Փաշինյանը նշեց՝ ճանապարհային քարտեզի իրագործման ուղղությամբ աշխատանքները ամբողջ թափով շարունակվելու են։
