Թաղավարդում ռուս խաղաղապահները պատասխանել են ադրբեջանցիների հերթական սադրանքներին: Հայերեն, ռուսերեն և ադրբեջաներեն լեզուներով կոչ է արվում զերծ մնալ սադրանքներից և չխախտել հրադադարի պահպանման ռեժիմը: Մարտունու շրջանի Կարմիր Շուկա և Թաղավարդ համայնքներում իրադրությունը հանգստյան օրերին և այսօր համեմատաբար հանգիստ է եղել: Բայց այսօր առավոտյան Թաղավարդում կրկին հնչել է հայտնի ձայնագրությունը:
Համայնքի ղեկավար Օլեգ Հարությունյանն է մանրամասնում:
Վերջին օրերին հանգիստ է եղել: 2-3 օր առաջ են ակտիվ խախտել հրադադարի ռեժիմը՝ հրազենային զինատեսակներով: Ձայնագրություններ են միացրել՝ իրենց աղոթքները և սպառնալիքներ: Այսօր էլ ռուս խաղաղապահներն են պատասխանել՝ կոչ անելով զերծ մնալ սադրանքներից: Վերջին 2 օրը ընդհանրապես չեն կրակել: Վախ չկա: Եթե անգամ վախենանք էլ, ուրիշ գնալու տեղ չունենք: Օտար երկիր գնալ չենք ուզում, սա է մեր հողը: Բայց երեխաները, իհարկե, վախենում են:
