Ստեփանակերտ-Բերձոր ճանապարհին տեղի ունեցած միջադեպի հետևանքով վիրավորում է ստացել 3 ադրբեջանցի զինծառայող, հարուցվել է քրեական գործ մի քանի հոդվածներով: Այս մասին ասվում է Ադրբեջանի Գլխավոր դատախազության և Ներքին գործերի նախարարության համատեղ հաղորդագրությունում։
Արցախի Ազգային անվտանգության ծառայության հաղորդագրության համաձայն՝ միջադեպը տեղի է ունեցել այսօր առավոտյան․ Շուշի քաղաքի անցակետի մոտ, «ադրբեջանցի զինծառայողների սադրիչ գործողություններին ի պատասխան անհայտ անձը պայթուցիկ սարք է նետել անցակետի հատվածում, որից հետո Ստեփանակերտ-Շուշի-Բերձոր միջպետական ճանապարհը երկկողմանի փակվել է»։
Արցախի մարդու իրավունքների պաշտպան Գեղամ Ստեփանյանը տեղեկացրել է, որ «դեպքի առնչությամբ Արցախի Հանրապետության քաղաքացին գտնվում է ռուսական խաղաղապահ զորակազմի կենտրոնակայանում» և « առաջիկա ժամերին հանձնվելու է Արցախի իրավապահներին»։
Սոցիալական ցանցերի օգտատերերն էլ պնդում են, որ նոյեմբերի 8-ին ադրբեջանցու կողմից սպանված Մարտիկ Երեմյանի եղբայրն է նռնակ նետել ադրբեջանցիների ուղղությամբ, ինչին հաջորդել են կրակոցները՝ հայկական քաղաքացիական մեքենայի ուղղությամբ:
Հիշեցնենք, Նոյեմբերի 8-ին Շուշիի մոտ ադրբեջանական կողմից արձակված կրակոցների հետևանքով տուժել էին երեք քաղաքացիներ, 22-ամյա Մարտիկ Երեմյանը սպանվել էր: Նրանք վթարավերականգնման աշխատանք էին կատարում Շուշիի մատույցներում ռուս խաղաղապահների դիրքերը սնուցող խողովակաշարի վրա:
