Լեռնային Ղարաբաղում խաղաղապահ ուժերի ռուսական զորակազմի կողմից իրականացվում է իրադրության շուրջօրյա մոնիտորինգ եւ հրադադարի ռեժիմի պահպանման վերահսկողություն քսաներեք դիտակետերում: Հրադադարի ռեժիմը պահպանվում է շփման գծի ողջ երկայնքով:
Լեռնային Ղարաբաղում շարունակվում են նախապատերազմական բնակության վայրեր վերադառնալ տեղի բնակիչները։ Մեկ օրում Հայաստանի տարածքից վերադարձել է եւս 569 մարդ։ Խաղաղապահ գործողության ընթացքում ապահովվել է ավելի քան 37 հազար արցախցու անվտանգ վերադարձը: Ռուս խաղաղապահների աջակցությամբ Լեռնային Ղարաբաղի մարտական գործողություններից տուժած շրջաններում շարունակվում է կենսական նշանակության ենթակառուցվածքների վերականգնումը: Խաղաղապահ գործողության մեկնարկից ի վեր վերականգնվել է ավելի քան 16 կմ էլեկտրահաղորդման գիծ, 48 հենարան, 31 տրանսֆորմատորային ենթակայան եւ 15 կմ կապի գծեր:
Ավարտվել են Ստեփանակերտի ևս մեկ դպրոցի վերականգնման աշխատանքները։ Թիվ 5 դպրոցը լիովին պատրաստ է կրթական գործընթացի մեկնարկին: Շարունակվում է Լեռնային Ղարաբաղի տարածքի պայթունավտանգ իրերից մաքրումը: Ընդհանուր առմամբ, ռուսական խաղաղապահ ուժերի ինժեներական ստորաբաժանումների կողմից Լեռնային Ղարաբաղում ականազերծվել է ավելի քան 137 հեկտար տարածք, շուրջ 25 կիլոմետր ճանապարհ, 195 տուն եւ սոցիալական օբյեկտներ, հայտնաբերվել եւ վնասազերծվել է ավելի քան 4,5 հազար պայթուցիկ առարկա:
Մարտակերտում Ռուսաստանի ՊՆ բժշկական ջոկատի մասնագետները սկսել են բժշկական օգնություն ցուցաբերել զինվորականներին ու տեղի բնակչությանը: Ռազմական հոսպիտալի արտագնա բժշկական բրիգադի կողմից ԴԱՇԲՈՒԼԱԳ բնակավայրում բժշկական օգնություն է ցուցաբերվել Լեռնային Ղարաբաղի 24 բնակչի: Ընդհանուր առմամբ, ռուս զինվորական բժիշկները բուժօգնություն են ցուցաբերել ավելի քան 420 քաղաքացու, որոնցից ավելի քան 50 – ը երեխաներ են:
Ռուսաստանի խաղաղապահ ուժերի եւ Կարմիր խաչի միջազգային կոմիտեի համակարգմամբ իրականացվում է զոհվածների մարմինների որոնում եւ փոխանակում: Ռուս խաղաղապահները շարունակում են աջակցել Լեռնային Ղարաբաղի հակամարտության ընթացքում անհայտ կորածների մասին տեղեկությունների հավաքագրմանը: Ռուսական խաղաղապահ ուժերի սպաների կողմից տեղեկատվության ճշտման համար մշակվել է ավելի քան 440 հեռախոսային դիմում, որոնք ստացվել են "թեժ գծով", անցկացվել է ավելի քան երկու հազար հանդիպում քաղաքացիների հետ: