Լեռնային Ղարաբաղում ՌԴ խաղաղապահ զորախմբի հրամանատարությունը հետաքննություն է իրականացնում Ադրբեջանի ԶՈՒ դիպուկահարի կրակոցների հետևանքով Մարտակերտի շրջանում խաղաղ բնակչի մահվան կապակցությամբ: Այս մասին այսօր ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:
«Հոկտեմբերի 9-ին Մարտակերտի շրջանում ադրբեջանական ԶՈՒ կրակոցների հետևանքով մահացու վիրավորում է ստացել խաղաղ բնակիչ։ Մենք ցավակցություն ենք հայտնում զոհվածի բոլոր հարազատներին ու մտերիմներին»,- ասել է Զախարովան՝ նշելով, որ իրենց հսկողության գոտում միջադեպեր թույլ չտալու համար ռուս խաղաղապահները մշտական կապի մեջ են Հայաստանի ու Ադրբեջանի գլխավոր շտաբների հետ։
Զախարովայի խոսքով՝ սույն ողբերգական միջադեպը հաստատում է եռակողմ հայտարարության բոլոր դրույթների խիստ պահպանման անհրաժեշտությունը։
«Մենք կոչ ենք անում երկու կողմերին «բոլորը բոլորի դիմաց» սկզբունքով փոխանակել գերիներին և փոխանակվել ականապատ դաշտերի քարտեզներով»,- շեշտել է Զախարովան:
