Երկրում ստեղծված անվտանգային իրավիճակով և բարեփոխումների անհրաժեշտությամբ պայմանավորված՝ ս.թ. փետրվարին ստորագրել եմ հրամանագիր մինչև 2022 թվականի մարտի 1-ը տեղական ինքնակառավարման մարմինների ընտրություններ չանցկացնելու մասին:
Այս մասին այսօր՝ հունիսի 30-ին ԱԺ նիստում ասել է ԱՀ նախագահ Արայիկ Հարությունյանն՝ ընդգծելով, որ ըստ իրավիճակից բխող մարտահրավերների ու հնարավորությունների փոփոխման, պատրաստ է վերանայելու այդ որոշումը նախատեսված ժամկետից վաղ անցկացնելու համար:
Երկրի ղեկավարը հավելել է նաև, որ կատարվում են նախապատրաստական աշխատանքներ տարածքային կառավարման և տեղական ինքնակառավարման համակարգերի բարեփոխումների ուղղությամբ՝ սահմանադրական պահանջին և հետպատերազմյան իրավիճակին համապատասխան:
Նախագահն իր խոսքում հստակ ընդգծել է, որ տարածքային կառավարման ու տեղական ինքնակառավարման ոլորտում ընթացիկ տարվա կարևորագույն առաջնահերթությունը տեղահանված քաղաքացիների բնակարանային խնդրի լուծումն է:
«Այդ նպատակով կիրառվում են տարբեր մոտեցումներ՝ բնակարանների գնումից ու տիրազուրկ տների զբաղեցումից մինչև նոր բնակարանների ու բնակավայրերի կառուցում: Այդ ծրագրերում առանցքային դերակատարություն ունեն տարածքային կառավարման ու տեղական ինքնակառավարման մարմինները», - նշել է նախագահ Արայիկ Հարությունյանը:
