ՀՀ Կառավարությունն այսօրվա նիստում հաստատեց Արցախի Հանրապետությունում հաշվառված եւ հաշվառման հասցեում գտնվող բնակելի անշարժ գույքը Ադրբեջանի կողմից 2020 թվականի սեպտեմբերի 27-ին Արցախի Հանրապետության դեմ սանձազերծված պատերազմի պատճառած ավերածությունների հետեւանքով կամ այլ պատճառներով կորցրած քաղաքացիների աջակցության միջոցառումը։
«Սա վերաբերում է Արցախի Հանրապետության այն քաղաքացիներին, ովքեր պատերազմի հետեւանքով կորցրել են իրենց տները՝ ավերածության արդյունքում։ Մենք այս պահին ունենք գործող մի միջոցառում, որը վերաբերում է այն քաղաքացիներին, ովքեր կորցրել են իրենց բնակավայրերը»,- ներկայացրեց նախարարը՝ հավելելով, որ բացի ավերածությունների արդյունքում կորցրած տներից կա նաեւ մի փոքր հատված, ովքեր այս պահին ուղղակի տեղահանված են որոշ գյուղերից։
Այդ քաղաքացիները նույնպես շահառու են հանդիսանալու, այսինքն բոլոր այն քաղաքացիները, ովքեր այս պահին չունեն բնակության վայր Արցախում՝ հանդիսանալու են գործող միջոցառման կամ այս միջոցառման շահառու։
«Այս միջոցառումը ենթադրում է յուրաքանչյուր անձի գծով 250 հազար դրամ աջակցության տրամադրում՝ ե՛ւ չափահաս, ե՛ւ անչափահաս երեխաների մասով»,- ասաց նա։
Վարչապետ Նիկոլ Փաշինյանն ասաց, որ այսինքն ընտանիքի յուրաքանչյուր անդամի հաշվով 250 հազար դրամ աջակցություն են տրամադրում։