«Ազգային անվտանգություն» կուսակցության նախագահ Գառնիկ Իսագուլյանի հայտարարությունների վերաբերյալ ՀՀ հատուկ քննչական ծառայությունում նախապատրաստված նյութերի հիման վրա որոշում է կայացվել քրեական գործի հարուցումը մերժելու մասին։
«Հայկական ժամանակ»-ի հարցին ի պատասխան՝ ՀՔԾ մամուլի խոսնակ Մարինա Օհանջանյանը տեղեկացրեց, որ քրեական գործի հարուցումը մերժվել է ՀՀ քրեական դատավարության 35-րդ հոդվածի 1-ին մասի 1-ին կետով՝ հանցադեպի բացակայության հիմքով։ Միաժամանակ Իսագուլյանի հայտարարությունների առթիվ հարուցվել է քրեական գործ ՀՀ քրեական օրենսգրքի 333-րդ հոդվածի՝ սուտ մատնության հատկանիշներով։
Հիշեցնենք՝ նոյեմբերի 23-ին Գառնիկ Իսագուլյանը ասուլիս էր տվել, որի ժամանակ հայտարարել էր, որ ՀՀ ԱԱԾ նախկին տնօրեն Արգիշտի Քյարամյանը ադրբեջանցիներին ՀՀ քաղաքացու 1400 անձնագիր է բաժանել։ Նա նաեւ նշել էր, որ հակառակորդի 400 հոգանոց խմբի Հադրութ մտնելը ապահովել է Քյարամյանը։ Ասուլիսից հետո ՀՀ գլխավոր դատախազությունը դրա վերաբերյալ հրապարակումները ուղարկել էր ՀՔԾ՝ քրեադատավարական ընթացակարգով ստուգելու եւ իրավական գնահատական տալու հանձնարարությամբ։
