Արցախի մարդու իրավունքների պաշտպան Արտակ Բեգլարյանը ստացել է տեղեկություններ՝ հայ ռազմագերիների մասնակցությամբ ադրբեջանական զորահանդես կազմակերպելու մասին, սակայն չի կարող ասել, թե որքանով են դրան հավաստի․ «Հաշվի առնելով նախընթաց գործընթացները, նրանց ձեռագիրը, հայատյացության մթնոլորտը, որը լայնորեն խրախուսվում է Ադրբեջանի իշխանությունների կողմից՝ տեսականորեն չեմ կարող բացառել, բայց հույս ունեմ, չասեմ իրենք բավարար մարդասեր կգտնվեն, գոնե ռացիոնալ առումով կհասկանան, որ դա իրենց համար լուրջ հարված է լինելու միջազգային հեղինակության տեսանկյունից, եթե իհարկե թքած չունեն դրա վրա»։
Բեգլարյանի համոզմամբ՝ ՀՀ եւ Արցախի իշխանությունները, ողջ հայությունը պետք է առավելագույն ջանքեր գործադրեն ուղիղ ճնշումների եւ միջազգային գործընկերների միջոցով, որպեսզի դադարեցվի այս մարդասիրական հարցերի քաղաքականացումը եւ ռազմագերիներին թաքցնելու պրակտիկան։
Խոսելով գերիների մասնակցությամբ հրապարակվող տեսանյութերից՝ Արցախի ՄԻՊ-ը նշեց, որ դրանց մեջ, այո, կան նաեւ կեղծ տեսանյութեր․ «Արձանագրել ենք դեպքեր սիրիական պատերազմից տեսանյութերի, լուսանկարների տարածման, լատինա-ամերիկյան նառկո-բառոնների կողմից նկարահանած տեսանյութի տարածման, բայց դեպքերի հիմնական մասը, ըստ մեր վերլուծության, իրական է, ավելին ասեմ, հիմնական մասում մենք կարողացել ենք պարզել անձանց ինքնությունը, ինչը եւս լրացուցիչ ապացույց է, որ դրանք կեղծ չեն»։
Արտակ Բեգլարյանն ընդգծեց, որ այս հանցագործությունները կատարվում են Ադրբեջանի զինված ուժերի կողմից եւ ունեն համակարգային բնույթ, ուստի ակնհայտ է, որ այն կատարում է պետությունը, ոչ թե անհատները, ինչպես փորձում է ներկայացնել Ադրբեջանի զինդատախազությունը․ «Սա նշանակում է, որ Հայատանը պետք է հասնի Ադրբեջան պետության միջազգային պատասխաանտվության ենթարկելուն»։
Բեգլարյանը հիշեցրեց, որ պատերազմական հանցագործությունները չեն սահմանափակվում միայն գերիների եւ դիերի հարցերով, ողջ պատերազմի ընթացքում նման հանցագործություններ կատարվել են քաղաքացիական բնակչության, հատուկ պաշտպանության մի շարք օբյեկտների՝ հիվանդանոցի, եկեղեցիների, դպրոցների նկատմամբ։
