11 Դեկտեմբեր, 2020 - Ռուսաստանի Պետդումայի պատգամավոր, ԱՊՀ երկրների ինստիտուտի տնօրեն Կոնստանտին Զատուլինը շարունակում է համարել, որ Արցախի Հանրապետության ժողովուրդն ունի ինքնորոշման իրավունք: Այս մասին Զատուլինն ասաց դեկտեմբերի 11-ին կազմակերպված Երևան-Մոսկվա առցանց քննարկման ընթացքում:
«Ես շարունակում եմ համարել, որ Լեռնային Ղարաբաղի կամ Արցախի Հանրապետության ժողովուրդն ունի ինքնորոշման իրավունք: Առավել ևս, որ Խորհրդային Միության փլուզման պահին Ադրբեջանի Խորհրդային Հանրապետությունն արդեն չէր վերահսկում Լեռնային Ղարաբաղի Ինքնավար Մարզի տարածքները: Վերանայման կարիք ունեն Ադրբեջանի այն հայտարարությունները, թե դա իրենց տարածքներն են»,- ասաց Զատուլինը:
Հայաստանի Հանրապետության արտաքին գործերի նախկին նախարար Էդվարդ Նալբանդյանը ճիշտ չի համարում այն միտքը, թե Ռուսաստանը բանակցային գործընթացից հանել է Լեռնային Ղարաբաղի կարգավիճակի հարցը: Այս մասին Նալբանդյանն ասաց դեկտեմբերի 11-ին կազմակերպված Երևան-Մոսկվա առցանց քննարկման ընթացքում:
Էդվարդ Նալբանդյանը նշեց, որ կարևոր է, թե որքանով համանախագահներին կհաջողվի շարունակել բանակցությունները Ղարաբաղի կարգավիճակի հարցով: