ՀՀ վարչապետ Նիկոլ Փաշինյանը Սանկտ Պետերբուրգում մասնակցելու է ԱՊՀ երկրների ոչ պաշտոնական գագաթնաժողովին, որոնց ընթացքում կլինեն շփումներ նաև Ադրբեջանի նախագահ Իլհամ Ալիևի հետ։ Այս մասին հայտնել է Նիկոլ Փաշինյանը դեկտեմբերի 24-ին հրավիրված ասուլիսին՝ անդրադառնալով այն հարցին, թե արդյոք այդ գագաթնաժողովին հնարավոր է հանդիպում Ադրբեջանի նախագահի հետ:
«Դեկտեմբերի 28-ին է նախատեսված այդ գագաթնաժողովը, այո, մասնակցելու եմ։ Այս պահին պաշտոնական երկկողմ հանդիպման առաջարկ չկա, բայց Ադրբեջանի նախագահի հետ շփում կլինի։ Պաշտոնական բանակցության առաջարկ այս պահին չենք ստացել։ Գագաթաժողովը ոչ ֆորմալ է, հետևաբար շփումները նույնպես ոչ ֆորմալ են»,-ասաց Նիկոլ Փաշինյանը։
ՀՀ վարչապետ Նիկոլ Փաշինյանը նոյեմբերի 26-ին Սոչիում հանդիպել է Ադրբեջանի նախագահի Իլհամ Ալիևի հետ։ Երկու երկրների ղեկավարները հանդիպել են նաև Բրյուսելում դեկտեմբերի 14-ին։
