Միչիգանում հանդիպել եմ Մեծ Դեթրոյթի շրջանի տարբեր հայկական կազմակերպությունների, եկեղեցական և եկեղեցու տարածքում գործող կառույցների, կրթական, մշակութային միությունների ղեկավարների հետ՝ ասվում է ՀՀ սփյուռքի գլխավոր հանձնակատար Զարեհ Սինանյանի Ֆեյսբուքի էջում:
«Հանդիպման ընթացքում ներկայացրել եմ գրասենյակի ծրագրերը՝ ընդգծելով մասնագիտական հայրենադարձության կարևորությունը և պետական համակարգում բարձր որակավորում ունեցող աշխատակիցների անհրաժեշտությունը։
Ընդգրկուն անդրադարձ եմ կատարել նաև Հայաստան-սփյուռք գործակցության ներկայիս մարտահրավերներին և գրասենյակի կողմից սփյուռքի հետ առողջ հարաբերությունների ստեղծման և խորացման աշխատանքներին: Հնարավորություն ունեցա պատասխանելու համայնքի ներկայացուցիչների հարցերին:
Արժանապատիվ Տեր Արեն Ջեբեջյանը շնորհակալություն հայտնեց այցի և հանդիպումների համար՝ կարևորելով համայնքի հետ տեղում աշխատանքը»,- նշված է գրառման մեջ:
