ԿԵ նախարարության Հայաստանի տարածքային զարգացման հիմնադրամի միջոցով
շարունակվում է Հայաստանի դպրոցների սեյսմիկ անվտանգության բարելավման ծրագիրը,
որի շրջանակում մեկնարկել են Երևանի 95-րդ հիմնական դպրոցի հիմնովին վերակառուցման
աշխատանքները:

Դպրոցը սեյսմակայուն կլինի մինչև 9 բալ ուժգնությամբ երկրաշարժի դեպքում, բացի
ապահովությունը և ժամանակակից տեսքը, կառույցը կունենա հակահրդեհային,
ջերմամեկուսացման, ջեռուցման համակարգեր, հարմարեցված կլինի հենաշարժողական
խնդիրներ ունեցող երեխաների համար, կունենա հարմարավետ մարզադահլիճ:

Դպրոցը նախատեսված է 600 աշակերտի համար, վերակառուցման համար ներդրված
գումարը կազմում է 1 միլիարդ 159 միլիոն դրամ, որի 20 տոկոսը կառավարության
ներդրումն է, 80 տոկոսը Ասիական զարգացման բանկից ներդրված վարկային միջոցներ են:

Նույն ծրագրով Հայաստանում նախատեսվում է առնվազն 46 դպրոցի կառուցում կամ ամրացում: