Այսօր ԱԺ-ում Կառավարության հետ հարցուպատասխանի ժամանակ «Լուսավոր Հայաստան» խմբակցության ղեկավար Էդմոն Մարուքյանը մեջբերեց վարչապետի՝ օրեր առաջ Կառավարության նիստն արված հայտարարությունը, որ այս տարի աշխատատեղերն ավելացել են մոտ 6600-ով: Մարուքյանը նաեւ հավելեց, որ մինչ այդ եղել է տեղեկություն, որ կորոնավիրուսով պայմանավորված մոտ 70 հազար աշխատատեղ կրճատվել է: «Եվ ես ուզում եմ հասկանալ, թե այս 6600-ը, որ ավելացել է, 70 հազարը վերականգնվել է, դրան գումարա՞ծ է 6600»,- հարցրեց պատգամավորը:
Վարչապետ Նիկոլ Փաշինյանը շեշտեց, որ 70 հազար աշխատատեղն ամբողջությամբ վերականգնվել է, իսկ հետո աճել է 6600-ով: Նա նաեւ պնդեց, որ այն վիճակագրությունը, որ ներկայացրել է Կառավարությունում, պաշտոնական է եւ անհերքելի: «Ես կհանձնարարեմ, որ այն վերլուծությունը, որ ինձ են տրամադրել, ձեզ նույնպես տրամադրեն: Ընդ որում՝ մարդկային գործոնը բացառված է, դա ինքնաշխատ թվայնացված համակարգ է եւ այդ թվերը գեներացվում են տնտեսվարողների գործողությունների ընթացքում»,- ասաց Փաշինյանը:
Նա մանրամասնեց, որ 6600 աշխատատեղն ավելացել է 2019 թվականի հուլիս ամսվա համեմատությամբ: «2019-2020 թվականին հսկայական թվով աշխատատեղեր են ի հայտ եկել, բայց մենք չենք կարող ասել, թե որն է եղել 0-ից, որն է եղել ստվերում, հիմա է եկել հարկային դաշտ»,- ընդգծեց վարչապետը:
Նա նաեւ հույս հայտնեց, որ օգոստոսի տվյալներն ավելի լավը կլինեն, որովհետեւ օգոստոսին մարզերում զբոսաշրջային ոլորտն աշխատել է ծանրաբեռնված:
