Թուրքիայում սեպտեմբերի 8-ին նոր տիպի կորոնավիրուսից (Covid-19) մահացել է 53 մարդ։ Այդ մասին տեղեկություն է հրապարակված Թուրքիայի առողջապահության նախարարության կայքէջում։
Նշվում է, որ 1 օրում անցկացված 110.565 թեստի արդյունքում հաստատվել է կորոնավարակի 1.761 նոր դեպք։ Նույն ժամանակահատվածում գրանցվել է ապաքինման 1.093 դեպք:
Ըստ պաշտոնական տվյալների` մինչև օրս համավարակից ապաքինվել է 253.245 մարդ, իսկ 1.159 հիվանդ էլ գտնվում է վերակենդանացման բաժանմունքում։
Թուրքիայում մինչև այժմ ընդհանուր առմամբ արձանագրվել է վարակման 283.270 և մահվան 6.782 դեպք։ Թեստավորումների թիվը հասել է 7 մլն 994.029-ի։
Թուրքիայի ներքին գործերի նախարարությունը հատուկ շրջաբերական է ուղարկել 81 նահանգների նահանգապետարաններ՝ կապված կորոնավիրուսի տարածման դեմ պայքարի միջոցառումների հետ։
Առաջնորդվելով երկրի առողջապահության նախարարության խորհուրդներով և նախագահ Ռեջեփ Թայիփ Էրդողանի հրահանգով՝ երկրում գործող բոլոր բացօթյա և փակ տարածքներում, ընդհուպ մինչև ծովափերում և զբոսայգիներում (բացառությամբ բնակարանների) քաղաքացիներն այսուհետև պարտավոր կլինեն բժշկական դիմակ կրել։
Սոցիալական հեռավորությունն ապահովելու նպատակով արգելվում է հանրային տրանսպորտում կանգնած ուղևորների երթևեկությունը։ Իսկ մետրոյի, տրամվայի և նման փոխադրամիջոցներում, որտեղ ուղևորների համար նախատեսված նստարանները շատ քիչ են, առողջապահական հաստատությունների կողմից կսահմանվի կանգնած ուղևորների առավելագույն թույլատրելի թիվը։