ՀՀ տարածքային կառավարման և ենթակառուցվածքների նախարար Գնել Սանոսյանը
Վայոց ձորում հետևել է սուբվենցիոն ծրագրերով իրականացվող աշխատանքների ընթացքին։
Նախարարը մարզպետ Արարատ Գրիգորյանի, «Ճանապարհային դեպարտամենտ»
հիմնադրամի գործադիր տնօրեն Գոռ Ավետիսյանի, համայնքապետերի ուղեկցությամբ Ռինդ բնակավայրում ծանոթացել է ֆուտբոլի դաշտի կառուցման և փողոցային լուսավորության ցանցի շինարարական աշխատանքներին։ Այս ծրագրերի բյուջեն կազմում է 153,1միլիոն դրամ։ Իրականացվում է պետություն/համայնք համաֆինանսավորմամբ։
Նախարարը այցելել է նաև Ռինդ համայնքի մանկապարտեզ, որը կապիտալ հիմնանորոգվել
և շահագործման էր հանձնվել 2021 թվականին։ Մանկապարտեզի հիմնանորոգումն արժեցել էր
ավելի քան 120 մլն դրամ։
Նախարարի հաջորդ կանգառը Աղավնաձոր բնակավայրն էր։ Այստեղ կրկին սուբվենցիոն
ծրագրով, 100 միլիոն դրամ բյուջեով իրականացվում է ներհամայնքային ճանապարհի 1 կմ հատվածի ասֆալտապատում և գազաֆիկացում։
Նախարարը ծանոթացել է նաև Գետափի հին գերեզմաններ տանող ճանապարհի
ասֆալտապատման աշխատանքներին։ Ծրագրի բյուջեն 45 միլիոն դրամ է։
Նախարար Սանոսյանը կանգառ է կատարել նաև Եղեգնաձոր համայնքում և ծանոթացել
Եղեգնաձորի թիվ 1 դպրոցի կառուցման աշխատանքներին։ Դպրոցը կառուցվում է Սեյսմիկ անվտանգության բարելավման ծրագրի շրջանակներում Հայաստանի Տարածքային զարգացման հիմնադրամի կողմից։ Արժեքը՝ 122,8 միլիոն դրամ։ Եղեգնաձորում նախարարը ծանոթացել է նաև Ալավերդյան փողոցի նորոգման և լուսավորության ցանցի անցկացման աշխատանքներին։ Ծրագրի արժեքը 32 միլիոն դրամ է։