ՀՀ կրթության, գիտության, մշակույթի և սպորտի նախարար Արայիկ Հարությունյանն այսօր՝ ուսումնական տարվա մեկնարկին, այցելել է Արագածոտնի մարզի Գեղարոտ և Գեղադիր համայնքներ, Շիրակի մարզի Արթիկ, Արարատի մարզի Արարատ և Գետազատ համայնքներ՝ մասնակցելու նախակրթարանների բացման արարողությանը:
Գեղարոտ, Արագածոտնի մարզ. Բացում ենք 21 նոր նախակրթարաններից մեկը
Նախարար Ա. Հարությունյանը շրջել է նախակրթարաններում, ծանոթացել կատարված աշխատանքներին, զրուցել մանկավարժների ու ծնողների հետ, շնորհավորել է համայնքների բնակիչներին նախակրթարանների բացման կապակցությամբ և նշել, որ առաջիկայում կդիտարկվի աշակերտներին, ծնողներին և դպրոցի աշխատակազմին հուզող հարցերի լուծման հնարավորությունները։
Գեղադիր, Արագածոտնի մարզ. Բացում ենք 21 նոր նախակրթարաններից մեկը
«Նախադպրոցական կրթությունը դպրոցում ուսումնական գործընթացի հաջող մեկնարկի հենասյունն է, և նման ծրագրերի արդյունքում կրթօջախների հիմնումը վաղը գրագետ և կրթված քաղաքացի ունենալու կարևոր նախապայմանն է»,-ասել է նախարարը:
Արթիկի վերակառուցվող ավագ դպրոցը
Իրականացված ծրագրի արդյունքում նախակրթարանները նաև կահավորվել են անհրաժեշտ գույքով, ապահովվել նախադպրոցական կրթության կազմակերպման համար բոլոր անհրաժեշտ պարագաներով:
Արարատ, Արարատի մարզ. Բացում ենք 21 նոր նախակրթարաններից մեկը
Արարատի մարզում ևս բացվեցին նոր նախակրթարաններ: ՀՀ ԿԳՄՍ նախարար Արայիկ Հարությունյանը, նոր ուսումնական տարվան ընդառաջ, այցելել է նաև Արարատի մարզի Արարատի թիվ 4 հիմնական դպրոցին կից նախակրթարան, որն այսօր իր դռներն է բացել 30 սաների առաջ: Կրթօջախի աշխատակազմը և բնակիչները կարևորել են նախակրթարանների հիմնումը և իրենց երեխաների՝ այսուհետ հարմարավետ ու գեղեցիկ պայմաններում կրթություն ստանալու հնարավորությունը։ Նախակրթարանում պահպանվել են ներառական կրթության կազմակերպման բոլոր պահանջները. հարմարեցված միջավայրում կրթություն են ստանալու նաև սահմանափակ հնարավորություններով երեխաներ:
Գետազատ, Արարատի մարզ. Բացում ենք 21 նոր նախակրթարաններից մեկը
ՀՀ ԿԳՄՍ նախարարը նախակրթարաններ շրջայցն ամփոփել է Գետազատ համայնքի միջնակարգ դպրոցին կից նախակրթարանով, որն այս տարի ընդունելու է թվով 20 սաների: Հյուրերը նախակրթարանի տնօրենի ուղեկցությամբ շրջել են խմբասենյակներով, եղել նաև նախակրթարանի բակում: Տնօրենը ներկայացրել է նախակրթարանի ստեղծման ընթացքը, խոսել հաղթահարված դժվարությունների ու առաջիկա անելիքների մասին: Նշենք նաև, որ ծրագրի շրջանակում իրականացվել է նաև դաստիարակների վերապատրաստում։
Հիշեցնենք, որ 2020 թվականի նախադպրոցական կրթության միկրոծրագրերի իրականացմանն ուղղված նախնական աշխատանքները սկսվել են դեռևս 2019 թվականի նոյեմբերից և իրականացվում է Համաշխարհային բանկի համաֆինանսավորմամբ՝ «Կրթական ծրագրերի կենտրոն» ԾԻԳ-ի «Կրթության բարելավում» վարկային ծրագրի շրջանակում:
