Վարչապետ Նիկոլ Փաշինյանը շնորհավորական ուղերձ է հղել Մոնղոլիայի վարչապետ Լուվսաննամսրայն Օյուն-Էրդենեին՝ Մոնղոլիայի ազգային տոնի առթիվ: Ուղերձում ասված է.
«Ջերմագույն շնորհավորանքներ եմ հղում Ձեզ և բարեկամ մոնղոլ ժողովրդին Մոնղոլիայի ազգային տոնի կապակցությամբ։
Վերահաստատում եմ Հայաստանի Հանրապետության պատրաստակամությունը Մոնղոլիայի հետ փոխադարձ հետաքրքրություն ներկայացնող ոլորտներում համագործակցության խորացման հարցում։
Լիահույս եմ, որ կներդնենք հնարավոր ջանքերը հայ-մոնղոլական հարաբերություններն ամրապնդելու և խորացնելու ուղղությամբ՝ ի բարօրություն մեր երկու երկրների և ժողովուրդների:
Մաղթում եմ Ձեզ քաջառողջություն և անսպառ հաջողություններ, իսկ Մոնղոլիայի բարեկամ ժողովրդին՝ խաղաղություն և երջանկություն»:
Հանրապետության նախագահ Վահագն Խաչատուրյանը նույնպես շնորհավորական ուղերձ է հղել Մոնղոլիայի նախագահ Ուխնաագիյն Խուրելսուխին Ազգային տոնի կապակցությամբ։
Նախագահ Խաչատուրյանի ուղերձում մասնավորապես ասվում է. «Հայաստանը մեծապես կարևորում է Մոնղոլիայի հետ փոխադարձ հարգանքի և վստահության վրա խարսխված բարեկամական հարաբերությունների առավել ամրապնդումն ու զարգացումը։
Լիահույս եմ, որ համատեղ ջանքերով կհաջողվի որակական նոր մակարդակի բարձրացնել հայ-մոնղոլական համագործակցությունն ու առկա քաղաքական երկխոսությունը՝ ի շահ մեր ժողովուրդների»:
