ԼՂ նախագահին կից հակաճգնաժամային խորհրդի նախագահ Տիգրան Պետրոսյանը «Ֆեյսբուք»-ի իր էջում հրապարակել է փաստաթղթի պատճենը, որն առաջարկել Լավրովը հուլիսի 25-ին:
Պետրոսյանը նշել է, որ ստիպված է հրապարակել այն, որպեսզի հանրությունը հասկանա, թե ինչ է իրականում կատարվում:
«Այսօր Պուտինը հնարավորություն ունի ՄԱԿ-ի անվտանգության նիստին փոխել իր վերաբերմունքն ու պլանները…
Սպասենք»,-գրել է պաշտոնյան:
Նշենք, որ փաստաթղթի վերնագրում նշված է, որ այն ներկայացնում է Ադրբեջանի կազմում նախկին ԼՂԻՄ տարածքի հայ բնակչության իրավունքներն ու սկզբունքները:
Կետերի թվում ներառված են ԼՂ բնակչության իրավունքերը՝ առնչվող կրթությանը, կենսապայմաններին, գործունեությանն ու աշխատանքին, համակեցությանն ու պաշտոն զբաղցնելուն, ԼՂ բնակչության դավանանքին ու կրոնական ազատությանը, նրանց անշարժ և շարժական գույքի պահպանությանը:
Ստորև՝ հրապարակված փաստաթղթերի լուսանկարները:
Հայ բնակչության անվտանգության և իրավունքների ապահովման հիմնական սկզբունքներն ու պարամետրերը Ադրբեջանական ԽՍՀ-ի նախկին ԼՂԻՄ-ի տարածքում՝ համապատասխան Ադրբեջանի Հանրապետության օրենսդրության
- Հավասարություն օրենքի առաջ և հավասար իրավական ապահովություն։ Էթնիկ, լեզվական կամ կրոնական և այլ պատճառներով խտրականության բացառում։
- Բռնի/ոչ կամավոր կերպով հայ բնակչության տեղահանման անթույլատրելիություն՝ իրենց բնակության կոմպակտ վայրից։
- Տեղական իշխանություններում և զինված խմբավորումներում մասնակցած լինելու պատրվակով հայ բնակչության հալածանքների, պատժի և իրավունքների ցանկացած սահմանափակման օրենսդրական արգելք՝ բացառությամբ ռազմական հանցագործությունների համար դատարանով մեղավոր ճանաչված անձանց:
- Ադրբեջանի Հանրապետության հանրապետական, շրջանային և տեղական մարմիններում օրենսդիր, դատական և գործադիր իշխանության՝ այդ թվում ոստիկանության և դատախազական մարմիններում հայ բնակչության համամասնական ներկայացվածություն:
- Հանրապետական, շրջանային և տեղական մակարդակներում հայ բնակչությանը վերաբերող որոշումների մշակման և ընդունման մասնակցություն:
- Ադրբեջաներենի հետ միասին հայերենի ազատ օգտագործում պետական հաստատություններում՝ այդ թվում պաշտոնական գրություններում և գրասենյակային աշխատանքներում, ինչպես նաև կոմպակտ հայ բնակչություն ունեցող բնակավայրերում ճանապարհային նշանների, պաստառների, հայտարարությունների տեղադրում հայերենով։
- Հայ բնակչության սեփականության՝ ներառյալ անշարժ գույքի և հողակտորների անձեռնմխելիություն:
- Հասարակական կազմակերպությունների հիմնում և նրանց անարգել գործելու ապահովում:
- Հայ բնակչության համար ապահովել իրենց կրոնի ազատ դավանանքի համար անհրաժեշտ պայմաններ, ինչպես նաև կրոնական հաստատությունների և կազմակերպությունների գործունակության ապահովման համար պայմանների ստեղծում։ Նրանց սեփականության անձեռնմխելիություն։
- Հայկական մշակույթի, ազգային ինքնատիպության՝ այդ թվում պատմամշակութային ժառանգության պահպանում և հայերենով զանգվածային տեղեկատվական միջոցների զարգացում։
- Նախադպրոցական, դպրոցական, միջին և բարձրագույն կրթության ապահովում հայերեն լեզվով՝ պետական և մասնավոր կրթական հաստատություններում։
- Հայաստանի Հանրապետության և Ադրբեջանի Հանրապետության միջև առանձին համաձայնագրի հիման վրա նախկին Ադրբեջանական ԽՍՀ Լեռնային Ղարաբաղի Ինքնավար Մարզի և Հայաստանի Հանրապետության հայ բնակչության միջև սերտ մշակութային, կրթական, գիտական, մեդիա, սպորտային և հումանիտար այլ շփումների ապահովում:
- Հայ բնակչության կողմից սահմանից այն կողմ ազատ և խաղաղ կապերի հաստատում և պահպանում այլ պետությունների տարածքում օրինական կերպով գտնվող անձանց հետ՝ մասնավորապես այն անձանց, ում հետ նրանք ունեն ընդհանուր էթնիկ, մշակութային, լեզվական և կրոնական ինքնություն կամ ընդհանուր մշակութային ժառանգություն։
- Հայ բնակչության կողմից դրսից տնտեսական և հումանիտար օգնության անխոչընդոտ ստացում: