Փոխնախարար Բալայանը պատասխանել է աշխարհազորի հասկացությանը, նպատակների, կառուցվածքի, ձևավորման կարգի, խաղաղ և պատերազմի ժամանակ աշխարհազորի պատրաստության և կիրառման, ենթակայության և ղեկավարման, աշխարհազորայինների հավաքագրման հետ կապված հարաբերությունների վերաբերյալ հարցերին։
Ասուլիսի ընթացքում Գաբրիել Բալայանը մանրամասն անդրադարձել է ՀՀ պաշտպանության նախարարության կողմից հանրային քննարկման ներկայացված օրենքի նախագծին: ՀՀ պաշտպանության նախարարի տեղակալը պարզաբանել է աշխարհազորի գործունեության հիմնական սկզբունքները, ստեղծման նպատակներն ու անհրաժեշտությունը, կտրականապես հերքել այն տեսակետը, թե նախագիծը ենթադրում է զինված մարդկանց առկայություն փողոցում:
«Համապատասխան ներգրավումը տեղի է ունենալու բացառապես մարտական գործողությունների, ռազմական սպառնալիքի անմիջական առկայության դեպքում: Զենք բաժանվելու է աշխարհազորում կցագրված քաղաքացիներին միայն այն պարագայում, երբ մարտական գործողություններ են սկսվում կոնկրետ վայրում կամ դրա սպառնալիք է առաջանում: Աշխարհազորում ներգրավված քաղաքացիներին ազատ շրջանառության զենք չի տրվելու, ինչը նշանակում է, որ քաղաքում զինված մարդիկ չեն շրջելու»,- շեշտել է Գաբրիել Բալայանը։
Աշխարհազորը կկազմակերպվի քաղաքացիների կամավորության և տարածքային սկզբունքով։ Այն կլինի զինված ուժերի գլխավոր շտաբի ենթակայությամբ գործող ստորաբաժանումների համալիր և կգործի ըստ ՀՀ վարչատարածքային բաժանման՝ պայմանականորեն բաղկացած զորամիավորումներից և դրանց ենթակա բրիգադներից ու գումարտակներից։ Աշխարհազորում կներգրավվեն մինչև 70 տարեկան անձինք։ Հավաքագրման գործընթացը խաղաղ պայմաններում կամավոր բնույթ է կրելու, իսկ զորակոչվելուց հետո արդեն աշխարհազորայիններին կտրվի զինծառայողի կարգավիճակ` դրանից բխող սոցիալական երաշխիքներով։
Անդրադառնալով աշխարհազորի կազմավորման անհրաժեշտությանը, Գաբրիել Բալայանը նշել է. «Իրավիճակը տարածաշրջանում փոխվում է, և դրան պետք է արձագանքել։ Բացի այդ, կամավորականներին պետք է կազմակերպել` նրանց գործողությունների արդյունավետությունը բարձրացնելու համար։ Եվ այս նախաձեռնությունը նպատակ ունի կանոնակարգելու այդ գործընթացները»։
Փոխնախարարը շեշտել է, որ աշխարհազորի առաջարկվող մոդելը հայկական է, չնայած այլ երկրների փորձը, իհարկե, ուսումնասիրված է: Նախագծի համաձայն` մարտական գործողությունների դեպքում հրամանատարներ են դառնում համայնքների ղեկավարների և մարզպետերի տեղակալները: Նախատեսվում է նաև, որ այդ պաշտոնները կզբաղեցնեն պաշտոնաթող զինվորականներ: Աշխարհազորում ներգրավված կլինեն նաև կանայք` որևէ խտրականություն չի լինելու, սակայն առաջին փուլում նրանք մարտական գործողությունների չեն մասնակցի։
