Այսօր առավոտյան Հայաստանի նախագահական նստավայրում տեղի է ունեցել Լիտվայի նախագահի դիմավորման պաշտոնական արարողությունը։

Լիտվայի Հանրապետության նախագահ Գիտանաս Նաուսեդան տիկնոջ՝ Դիանա Նաուսեդիենի հետ երկօրյա պաշտոնական այցով ժամանել է Հայաստան։

Դիմավորման պաշտոնական արարողությունից հետո տեղի կունենա նախագահներ Վահագն Խաչատուրյանի և Գիտանաս Նաուսեդայի առանձնազրույցը, որին կհաջորդի ընդլայնված կազմով հանդիպումը երկու երկրների պատվիրակությունների մասնակցությամբ։

Լիտվայի և Հայաստանի նախագահները մամուլի համար հայտարարությամբ հանդես կգան:

 

Գիտանաս Նաուսեդան ծաղկեպսակ է դրել Հայոց ցեղասպանության զոհերի հիշատակը հավերժացնող հուշակոթողին, այնուհետև հյուրերը ծաղիկներ են դրել անմար կրակի մոտ և մեկ րոպե լռությամբ հարգել Հայոց ցեղասպանության սրբադասված նահատակների հիշատակը:

 

Նրանք շրջել են նաև Հայոց ցեղասպանության թանգարանում, ծանոթացել մշտական և ժամանակավոր ցուցադրություններին, որից հետո Լիտվայի նախագահը գրառում է կատարել Պատվավոր հյուրերի հուշամատյանում:

 

 

Շնորհակալություն հայտնելով այցի համար՝ Հարություն Մարությանը պատվավոր հյուրին է նվիրել Հայոց ցեղասպանության մասին գրքեր: Իր հերթին, պարոն Գիտանաս Նաուսեդան Հայոց ցեղասպանության թանգարանին է նվիրել Հոլոքոստի մասին գրքեր:

• Կիսվել: