Իմ համոզմունքը շարունակում է մնալ նույնը, որ երաշխավորված անվտանգություն կարող է ապահովել միայն խաղաղությունը: Այս մասին նշեց ՀՀ վարչապետ Նիկոլ Փաշինյանը` պատասխանելով Հանրային հեռուստաընկերության հարցերին:
«Քանի դեռ մենք չունենք համապարփակ խաղաղություն, մենք համապարփակ անվտանգության մասին չենք կարող խոսել: Հետևաբար մեր բոլոր ջանքերը նույնիսկ ամենասուր իրավիճակներում ուղղված են խաղաղությանը: Եթե մենք կարծում ենք, որ մեր սահմանների անձեռնմխելիությունը պետք է պաշտպանվի, այդ թվում՝ մեր բանակի ջանքերով և դիվանագիտական միջոցներով, այդ գործողության հեռահար նպատակը նույնպես խաղաղությունն է: Մենք փորձում ենք այնպես անել, որ մեր դիրքորոշումները հստակ լինեն միջազգային հանրության համար, և իրավիճակի մասին միջազգային հանրությունն օբյեկտիվ տեղեկություն ստանա»,- ասաց նա:
Փաշինյանը նշեց, որ ՀՀ անվտանգությունն ապահովելու համար անհրաժեշտ բոլոր ուղղություններով ակտիվ աշխատանք է տարվում:
Ինչքան սուր է վիճակը, այնքան ավելի սուր է խաղաղության անհրաժեշտությունը։ Այս մասին այսօր Հանրային հեռուստաընկերությանը տված հարցազրույցում ասաց ՀՀ վարչապետ Նիկոլ Փաշինյանը։
Ինչ վերաբերում է «խաղաղության դարաշրջանի հոգեհանգիստ» ձևակերպմանը, վարչապետը նշեց, որ մեր խնդիրը շարունակում է մնալ այն, որ Հայաստանի շուրջ և տարածաշրջանում բացվի խաղաղության դարաշրջան։
«Հոգահանգստի համար կա պարտադիր պայման՝ ծնված, հասունացած, տարիքն առած պետք է լինի, իսկ չի կարելի խոսել մի երևույթի հոգեհանգստի մասին, որը դեռ չի ծնվել։ Մեր ամբողջ նպատակը, խնդիրը եղել և շարունակում է մնալ այն, որ Հայաստանի շուրջ և տարածաշրջանում բացվի խաղաղության դարաշրջան։
Մենք այնպես պետք է անենք, որ խաղաղությունը դառնա տարածաշրջանի համար ընդհանուր շահ։ Խաղաղության մասին խոսել չի նշանակում հայտարարել, որ այդ խաղաղությունը հաստատված է, «խաղաղություն» բառը պետք է ճիշտ ձևակերպված ընդունենք, և նույնիսկ եթե մեկ ամիս չեն կրակել, երեք ամիս, կես տարի, երեք տարի չեն կրակել, դա դեռ չի նշանակում, որ խաղաղություն է։ Խաղաղությունը լուրջ ինստիտուցիոնալ երևույթ է, չնայած մեր երրորդ հանրապետության պատմության մեջ այդպիսի երեք ամիս դժվար կլինի գտնել, որ չեն կրակել»,- ասաց նա։
ՀՀ վարչապետ Նիկոլ Փաշինյանը, պատասխանելով Հանրային հեռուստաընկերության հարցերին, անդրադարձավ հայ-ադրբեջանական սահմանին միջազգային դիտորդների անհրաժեշտությանը:
«Այն առաքելությունը, որի մասին Ֆրանսիան հայտարարել է, խոսքը պաշտպանության նախարարության կողմից ուղարկվող առաքելության մասին է, որը տեղում պետք է գնահատի անվտանգային իրավիճակը հետագա վերլուծության և գնահատման համար:
Երբ մենք խոսում ենք միջազգային դիտորդական առաքելության մասին, մենք նկատի ունենք կա՛մ երկարաժամկետ, կա՛մ մշտական դիտորդական առաքելության մեխանիզմը, որի կարևորագույն նպատակներից մեկը իրադրության վերաբերյալ անաչառ տեղեկատվության փոխանցումն է միջազգային համապատասխան կառույցներին, որից հետո կբխեն համապատասխան գործողություններ: Այս տրամաբանությունը բխում է նրանից, որ երբեք Ադրբեջանը չի ասում` ես խախտեցի զինադադարը: Իրենք միշտ փորձում են ներկայացնել, թե ինչ-որ սադրանք է եղել և այլն:
Բնականաբար, մենք այդ անհիմն տեղեկատվությունը բոլոր հնարավոր միջոցներով հերքում ենք, բայց մյուս կողմից էլ ասում ենք՝ քանի որ սա շարունակվող իրավիճակ է, ճիշտ կլինի, որ միջազգային հանրությունն ունենա դիտորդական առաքելություն, որպեսզի տեղում գնահատի իրավիճակը»,- ասաց վարչապետը:
