Հայաստանի նախագահ Վահագն Խաչատուրյանը և Չեռնոգորիայի նախագահ Միլո Ջուկանովիչը հանգամանալից քննարկել են Հայաստան-Չեռնոգորիա երկկողմ,փոխշահավետ հարաբերությունները և ամրապնդելու հեռանկարներն ու գործնական քայլերը: Չեռնոգորիայի նախագահի հետ հանդիպումից հետո մամուլի ասուլիսի ժամանակ այս մասին հայտնեց Հայաստանի նախագահ Վահագն Խաչատուրյանը՝ հավելելով, որ վերահաստատել են երկուստեք պատրաստակամությունն այդ հարցում:
«Հատուկ անդրադարձ կատարվեց երկկողմ տնտեսական համագործակցության խորացմանը և առևտրաշրջանառության ծավալների ավելացման հնարավորություններին: Արձանագրեցինք,որ զբոսաշրջության և տեղեկատվական տեխնոլոգիաների ոլորտներում առկա է համագործակցության մեծ ներուժ և պատրաստակամություն հայտնեցինք ամեն կերպ աջակցելու դրա իրացմանը: Այդ համատեքստում անդրադարձանք նաև արդյունաբերության, առողջապահության, վերականգնվող էներգիայի ոլորտներում փոխգործակցության հեռանկարներին: Ուրախ եմ արձանագրել, որ Չեռնոգորիայի պատվիրակության կազմում ընդգրկված է նաև Պոդգորիցայի քաղաքապետը: Երևանն ու Պոտգորիցան դեռ 1978 թվականին ստորագրել են համագործակցության մասին համաձայնագիր, և մենք նախագահ Ջոկանովիչի հետ պայմանավորվածություն ձեռք բերեցինք աջակցել երկու մայրաքաղաքների իշխանություններին՝ համագործակցությանը նոր թափ հաղորդելու հարցում»,- ասաց Խաչատուրյանը:
Վահագն Խաչատուրյանը իր գործընկերոջ հետ քննարկել է տարածաշրջանում կայուն խաղաղության հաստատելուն ուղղված Հայաստանի ջանքերը:
«Ուրախությամբ եմ արձանագրում երկկողմ, միջազգային և տարածաշրջանային հարցերի շուրջ մեր տեսակետների ընդհանրությունը:
Հատուկ ընդգծվեց հայ ռազմագերիների անհապաղ հայրենադարձության անհրաժեշտությունը և այլ հրատապ մարդասիրական հարցերի շուտափույթ լուծումը, այդ թվում Արցախում և Ադրբեջանի վերահսկողության տակ գտնվող հայկական մշակութային կոթողների պահպանման անհրաժեշտությունը»,- եզրափակեց Խաչատուրյանը:
