Դպրոցների սեյսմիկ անվտանգության մակարդակի բարձրացման ծրագրերն իրականացվում են Հայաստանի տարածքային զարգացման հիմնադրամի եւ Ասիական բանկի կողմից 2015 թ. ստորագրված վարկային համաձայնագրի շրջանակում: «Ծրագրի ժամկետը սահմանվել է մինչեւ 2021 թ. մայիս ամիսը, իսկ 2018 թ. փոփոխությամբ այն երկարաձգվել է մինչեւ 2024 թ.մայիսի 31-ը»,- այս մասին ասել է ՀՀ հաշվեքննիչ պալատի հինգերորդ վարչության պետ Ժորա Մարգարյանը մայիսի 18-ին ԱԺ ֆինանսավարկային եւ բյուջետային հարցերի ու ԱԺ տարածքային կառավարման, տեղական ինքնակառավարման, գյուղատնտեսության եւ շրջակա միջավայրի պահպանության հարցերի մշտական հանձնաժողովների համատեղ նիստի ժամանակ:
Նրա խոսքով՝ ՀՀ կառավարության որոշմամբ հաստատված ծրագրով նախատեսվել է 377 դպրոցների շենքերի սեյսմիկ կայունության բարձրացում, սեյսմիկ աղետների պատրաստվածության եւ արձագանքման կարողությունների հզորացում, սեյսմիկ աղետների եւ ռիսկերի կառավարման եւ նվազացման օժանդակություն, համակարգերի բարելավում:
2016 թ. հավանություն է տրվել ծրագրին: Առաջին փուլով իրականացվել են 8 դպրոցի վերակառուցման աշխատանքներ: 2018 թ. Կառավարության որոշմամբ դպրոցների թիվը հասել է 435-ի: Առաջին եւ երկրորդ փուլով կառուցվող դպրոցների թիվը 46 է:
ՀՀ հաշվեքննիչ պալատի կողմից հաշվեքննության են ենթակվել դպրոցների սեյսմիկ անվտանգության մակարդակի բարձրացման ծրագրերի շրջանակում 2017-2019 թթ. պետական բյուջեով իրականացված շենքերի շինարարության եւ նախագծահետազոտական ծախսերը:
Հաշվեքննիչ պալատի ներկայացուցչի խոսքով՝ պայմանագրերով սահմանված նախագծային աշխատանքներն անհրաժեշտ ժամկետներում չեն կատարվել:
«Ոչ մի նախագծի կազմ չի համապատասխանել օրենսդրությամբ սահմանված պահաջներին, սակայն պայմանագրային գումարների նվազեցումներ չեն կատարվել: Որոշ դեպքերում կատարողականում հաշվառված ծավալները գերազանցում են փաստաթղթերում նշվածներին»,-ասել է Ժորա Մարգարյանը:
Հաշվեքննիչ պալատը ՀՀ տարածքային կառավարման եւ ենթակառուցվածքների նախարարությանը ներկայացրել է 9 առաջարկ, որով հնարավորություն կընձեռվի մշակել եւ հաստատել միջոցառումների ծրագիր:
ՀՀ հաշվեքննիչ պալատի նախագահ Ատոմ Ջանջուղազյանի խոսքով՝ ներկայացված եզրակացությունները համակարգային խնդիրների ուղղությամբ մտածելու առիթ են տալիս:
ՀՀ տարածքային կառավարման եւ ենթակառուցվածքների նախարարի տեղակալ Վաչե Տերտերյանի խոսքով՝ Հաշվեքննիչ պալատի ուղարկած առաջարկությունները նախարարությունը մանրակրկիտ կուսումնասիրի: Նա նշել է, որ Հիմնադրամն աշխատում է երկու փասթաթղթային հենքի վրա՝ ազգային օրենսդրության եւ Հիմնադրամի միջազգային պարտավորությունների շրջանակում:
Հայաստանի տարածքային զարգացման հիմնադրամի գործադիր տնօրեն Արթուր Սողոմոնյանը նշել է, որ բոլոր դիտարկումների վերաբերյալ ներկայացվել են մանրամասն պարզաբանումներ: Նա ընդգծել է, որ 2019 թ. հետո կատարվել են անհրաժեշտ փոփոխություններ. նախագծող կազմակերպությունները նախագծերի հետ միասին ներկայացնում են նաեւ նախահաշիվները: «Հիմնադրամի կողմից ներկայացված նախահաշիվներն անցել են բոլոր ազգային փորձաքննությունները: Միջազգային փորձաքննության եւ փորձագետների ուշադրության կենտրոնում են ոչ միայն նախագծման աշխատանքները, այլ նաեւ շինարարության ընթացքն ամբողջությամբ»,- նշել է Արթուր Սողոմոնյանը: Նա տեղեկացրել է, որ Հաշվեքննիչ պալատի դիտարկումները հիմք կտան կատարելու անհրաժեշտ քայլեր՝ եղած ռիսկերը հնարավորինս չեզոքացնելու համար:
