Փոխվարչապետ Ավինյանը այսօրվա Կառավարության նիստի ժամանակ հայտնեց, որ ոգրծարկվել է հանրագրերի էլեկտրոնային միասնական հարթակը․
«Մենք ցանկանում ենք էլեկտրոնային կառավարման գործիքների միջոցով էլ ավելի խթանել քաղաքացիների ներգրավվածությունը որոշումների կայացման գործընթացում: Ուզում եմ տեղեկացնել, որ գործարկվել է էլեկտրոնային ժողովրդավարության և մասնակցային կառավարման կարևոր գործիք՝ հանրագրերի էլեկտրոնային միասնական հարթակը՝ հանրագիր.հայ-ը»,- նշեց Ավինյանը՝ հիշեցնելով՝ հանրագիրը հանրային նշանակության հարցերի վերաբերյալ գրություն է, որի միջոցով քաղաքացիները կարող են ներկայացնել տարբեր ոլորտների հարցերի կարգավորման վերաբերյալ առաջարկություններ կամ էլ պետական, տեղական կամ ինքնակառավարման մարմինների ու պաշտոնատար անձանց թերությունների շտկման կամ գործունեության բարելավման վերաբերյալ հաղորդում:
Հանրագրերի միասնական հարթակը հնարավորություն է տալու ներկայացնել կոլեկտիվ և անհատական հանրագրեր, աջակցել ներկայացնող նախաձեռնություններին, հետևել հանրագրի ընթացքին, էլեկտրոնային եղանակով ստանալ հանրագրի պատասխանը: