Երեկ կայացել է Հայաստանի բասկետբոլի ֆեդերացիայի նախագահության նիստը, որի ընթացքում ամփոփվել են 2022 թվականի Եվրոպայի առաջնություններում Հայաստանի ազգային հավաքականի և Մ16 տարեկանների գրանցած արդյունքները:

Այս մասին հայտնում է Բասկետբոլի ֆեդերացիայից: Նիստում նշվել է, որ հաջորդ տարի ևս պետք է մասնակցել Մ16 և Մ18 տարեկանների Եվրոպայի առաջնության C դիվիզոններին: Որոշում է կայացվել, որ մինչև սեպտեմբեր հավաքականների բոլոր տարիքային խմբերում կլինեն մարզչական նշանակումներ, իսկ մինչև հոկտեմբեր կհստակեցվի կանանց Մ20 տարեկանների՝ գալիք տարվա Եվրոպայի առաջնության B դիվիզիոնում մասնակցության հարցը:Օրակարգի մեկ այլ հարցով խոսվել է տղամարդկանց Հայաստանի կանոնավոր առաջնության անցկացման մասին: Որոշում է կայացվել, որ 2022/2023 մրցաշրջանում Հայաստանի առաջնությունը կանցկացվի բասկետբոլի ֆեդերացիայի հովանո ներքո: Առաջնության ձևաչափը և մասնակիցների կազմը հայտնի կդառնա մինչև օգոստոսի 20-ը:

Հայաստանի տղամարդկանց և կանանց մինչև 16 տարեկանների հավաքականները դարձել են Եվրոպայի առաջնության C դիվիզիոնի փոխչեմպիոններ, իսկ կանանց Հայաստանի Մ20 տարեկանների հավաքականը Եվրոպայի առաջնության B դիվիզիոնում 18 թիմերի պայքարում գրավել է 16-րդ տեղը: