ՀՀ Ազգային ժողովի «Քաղաքացիական պայմանագիր» խմբակցության պատգամավոր Արուսյակ Մանավազյանը «Ֆեյսբուք» սոցիալական ցանցի իր էջում տեղեկացրել է, որ ԱԺ-ում հանդիպել է «Բաց դաս»-ի շրջանակում հյուրընկալված Արմավիրի մարզի Աղավնատուն համայնքի՝ Ղուկաս Աբգարյանի անվան միջնակարգ դպրոցի աշակերտների և ուսուցիչների հետ:
Վերջինս զրույցի ընթացքում հետաքրքրվել է, թե հիմնականում ի՞նչ մասնագիտական կողմնորոշում ունեն աշակերտները: Նրանց պատասխանները, ինչպես նշում է Մանավազյանը, բավականին տարբեր են եղել՝ հաշվապահ, իրավաբան, խոհարար, թուրքագետ, ատամնաբույժ, թարգմանիչ, աշակերտներից մեկն էլ հետագայում իրեն խորհրդարանում էր տեսնում՝ պատգամավորի կարգավիճակով:
Պատգամավորը աշակերտներին խորհուրդ է տվել մասնագիտություն ընտրելիս, ինչպես նաեւ նոր մասնագիտության մեջ հմտանալիս չվախենալ, անընդհատ աշխատել եւ կատարելագործվել: «Ցանկացած տարիքում ուշ չէ»,- նշել է նա:
Հանդիպման ավարտին հյուրերն այցելել են Ազգային ժողովի թանգարան, ծանոթացել շենքի պատմությանն ու շրջել գրադարանում: