Լոռու մարզային վարչության և ենթակա բաժինների բացատրական աշխատանքի արդյունքում ապրիլի 25-ին հաղորդում է ստացվել ոստիկանության Տարոնի բաժնում:
Անհայտ քաղաքացին զանգել է 911 ծառայություն և հայտնել, որ հրազեն է թողել Վանաձորի նախկին ռեստորանի տարածքում: Ոստիկանները կիսաքանդ շենքի նշված վայրում հայտնաբերել են ատրճանակ:
Նույն օրը ոստիկանության Բազումի բաժին է զանգել մեկ այլ քաղաքացի: Ներկայանալով Արցախյան առաջին պատերազմի մասնակից՝ նա հայտնել է, թե որտեղ է թաքցրել այն ժամանակ հետը բերած զենք-զինամթերքը: Ոստիկանները նշված վայրում հայտնաբերել են ատրճանակի նմանվող առարկա, պայթուցիչով նռնակ և երեք փամփշտատուփ՝ 60 փամփուշտով:
Նույն օրը նման հաղորդումներ են ստացվել նաև ոստիկանության Գուգարքի և Ստեփանավանի բաժիններում: Գուգարքում վերջին պատերազմի մասնակիցը հուշաղբյուրի մոտ թողել է մեկ հրացան, մեկ նռնակ և մեկ պայթուցիչ, իսկ Ստեփանավանի լճերի հարակից շինության մեջ ոստիկանները հայտնաբերել են անհայտ քաղաքացու թողածը՝ կարճեցված փողով որսորդական հրացան, ատրճանակ ու փամփուշտներ:
Տաշիրի ոստիկանների բացատրական աշխատանքի արդյունքում 58-ամյա մի տղամարդ հանձնել է ատրճանակ ու փամփուշտներ, որոնք, ըստ նրա, ձեռք էր բերել դեռևս 1994 թվականին: Ոստիկանության Թումանյանի բաժնում 56-ամյա տղամարդն էլ կամավոր հանձնել է ինքնաշեն ատրճանակ, նռնակ, պայթուցիչ ու փամփուշտներ:
Կանխարգելիչ միջոցառումները շարունակվում են ամբողջ հանրապետությունում:
