Այսօր՝ դեկտեմբերի 24-ին, նախատեսված էր Վանաձորի նորընտիր ավագանու անդրանիկ նիստը, որտեղ պետք է ավագանու անդամներն ընտրեին համայնքի ղեկավար: Սակայն նիստը չկայացավ:
Համայնքի աշխատակազմի քարտուղարի պաշտոնակատար Դավիթ Հակոբյանն ընթերցեց վերաքննիչ վարչական դատարանի որոշումը, ըստ որի՝ «Լուսավոր Հայաստան» կուսակցության հայցի հիման վրա միջանկյալ միջոց է կիրառել, որով արգելվում է Վանաձորի ավագանուն այս ընթացքում ավագանու նիստ հրավիրել՝ համայնքապետ ընտրելու օրակարգով: Նշենք, որ «Լուսավոր Հայաստան»-ը հայց է ներկայացրել դատարան՝ բողոքարկելով ավագանու մանդատների բախշման մասին ընտրական հանձնաժողովի որոշումը։ Կուսակցությունը չի հաղթահարել ընտրական շեմը։
Բացի այդ, այսօր ավագանու ընտրված 33 անդամից նիստին ներկայացել էր 16-ը, այսինքն՝ նաև քվորում չկար։
Հիշեցնենք՝ դեկտեմբերի 5-ի ՏԻՄ ընտրությունների արդյունքներով Վանաձորում ամենաշատ ձայներն ստացել է «Մամիկոն Ասլանյան» դաշինքը՝ 38.70 տոկոս, «Քաղաքացիական պայմանագիր»-ն ստացել է 25,05 տոկոս ձայն, «Հայաստանի սոցիալիստական աշխատավորական» կուսակցությունը 14,53 ձայնով երրորդն է, «Հայրենիք»-ը 4,48 ձայնով չորրորդ տեղում է, իսկ «Ապրելու երկիր»-ը եզրափակում է հնգյակը՝ 4,29 տոկոս ձայնով։
Այսօր լրագրողների հետ զրույցում Վանաձոր համայնքի աշխատակազմի ղեկավարի պաշտոնակատար Դավիթ Հակոբյանը հայտնեց, որ երբ ունենան դատարանի որոշումը, հաջորդ օրն ավագանու նիստը կգումարվի։
Հարցին՝ ո՞վ է կազմակերպելու համայնքի աշխատանքները, նա պատասխանեց. «Դուք գիտեք, որ համայնքապետի պաշտոնակատար կար, որի լիազորությունները դադարել են: Այս պահին աշխատակազմի ղեկավարի լիազորությունները ես եմ կատարում, համայնքապետի պաշտոնակատար չկա, համայնքապետի տեղակալ նույնպես չկա»:
Նկատենք, որ անկախ նրանից, թե ով կընտրվի Վանաձորում համայնքապետ, մանդատները բաշխվել են հետևյալ կերպ՝ «Մամիկոն Ասլանյան» կուսակցությունների դաշինք»՝ 15 մանդատ, «Քաղաքացիական պայմանագիր»՝ 9 մանդատ, «Հայաստանի սոցիալիստական աշխատավորական» կուսակցություն՝ 5 մանդատ, «Հայրենիք» և «Ապրելու երկիր» կուսակցություններ՝ 2-ական մանդատ։
Հիշեցնենք նաև, որ օրեր առաջ «Մամիկոն Ասլանյան» դաշինքի համայնքապետի թեկնածու, Վանաձորի նախկին քաղաքապետ Մամիկոն Ասլանյանը կալանավորվեց: Նրան մեղադրանք է առաջադրվել ՀՀ ՔՕ 308-րդ հոդվածի 1-ին եւ 2-րդ մասերի (պաշտոնեական լիազորությունները չարաշահելը), 309-րդ հոդվածի (պաշտոնեական լիազորություններն անցնելը), 314-րդ հոդվածի 1-ին մասի (պաշտոնեական կեղծիքը) հատկանիշներով։