Ինչպես արդեն տեղեկացրել էինք, ԱԺ «Լուսավոր Հայաստան» խմբակցությունն այսօր որոշել է խորհրդարանում բարձրացնել ՀՀ կրթության, գիտության, մշակույթի եւ սպորտի նախարար Արայիկ Հարությունյանի հրաժարականի հարցը: Այդ առիթով ԼՀԿ-ական պատգամավոր Անի Սամսոնյանը ԱԺ նիստերի դահլիճ է բերել պաստառ, որի վրա գրված է. «Քա՛յլ արա, հեռացի՛ր դուխով»: Դրան զուգահեռ ԱԺ-ի դիմաց ԼՀԿ-ն հրավիրել է ցանկացողներին ՝ մասնակցելու նույն պահանջով բողոքի ակցիայի:
ԱԺ պատգամավորներին պաստառը շատ է ուրախացրել: Նրանցից ոմանք պաստառի ֆոնին լուսանկարվում են եւ այն տեղադրում սոցցանցի իրենց էջերում: ՀՀ ԱԺ փոխխոսնակ Ալեն Սիմոնյանն իր ու պատգամավոր Հրաչյա Հակոբյանի լուսանկարը «Ֆեյսբուք»-ում մակագրել է այսպես. «Թեժ աշունը ԱԺ դահլիճում»:
