Ազգային ժողովի նախագահ Ալեն Սիմոնյանը խորհրդարանում կառավարության ծրագրի քննարկման ընթացքում «Պատիվ ունեմ» խմբակցության պատգամավոր Աննա Մկրտչյանին նիստերի դահլիճից հեռացնելու որոշում կայացրեց: Նիստի ընթացքում վարչապետ Նիկոլ Փաշինյանը պատասխանում էր «Պատիվ ունեմ» խմբակցության պատգամավոր Տիգրան Աբրահամյանի հարցին, սակայն Աննա Մկրտչյանը տեղից միջամտեց:
«Ես հեռացնում եմ Ձեզ նիստերի դահլիճից մինչև օրվա ավարտ, տիկին Մկրտչյան: Խնդրում եմ հեռացեք դահլիճից, այլապես ես ստիպված կլինեմ անվտանգության աշխատակիցներին խնդրել, որ Ձեզ հեռացնեն դահլիճից»,- ասաց Սիմոնյանը:
Աննա Մկրտչյանը դահլիճից չհեռացավ, ինչից հետո Ալեն Սիմոնյանն անվտանգության աշխատակիցների հրավիրեց, որպեսզի պատգամավորին դահլիճից հեռացնեն:
Անվտանգության աշխատակիցների ներս մտնելու պահին իրենց տեղերից բարձրացան «Հայաստան» և «Պատիվ ունեմ» խմբակցությունների պատգամավորները և մոտեցան դահլիճի այն հատվածին, որտեղ նստած էր Աննա Մկրտչյանը՝ փորձելով համոզել, որպեսզի պատգամավորին դահլիճից չհեռացնեն:
Ազգային ժողովի նիստերի դահլիճում քաշքշուկ տեղի ունեցավ՝ անվտանգության աշխատակիցների և ընդդիմադիր պատգամավորների միջև, այն բանից հետո, երբ անվտանգության աշխատակիցները փորձել են դահլիճից հեռացնել «Պատիվ ունեմ խմբակցության պատգամավոր Աննա Մկրտչյանին: Տեսանյութում երևում է, թե ինչպես են մի խումբ ընդդիմադիր պատգամավորներ և անվտանգության աշխատակիցներ քաշքշում միմյանց:
Պայթունավտանգ միջադեպը տեղի է ունեցել այն բանից հետո, երբ ԱԺ նախագահ Ալեն Սիմոնյանն անվտանգության աշխատակիցների էր հրավիրել պատգամավոր Աննա Մկրտչյանին դահլիճից հեռացնելու համար և նիստն ընդմիջել 20 րոպեով: