ԱԺ «Քաղաքացիական պայմանագիր» խմբակցության պատգամավոր Վաղարշակ Հակոբյանը հայտարարեց՝ շատ կարևոր նախագծի մասին են այսօր խոսում՝ ընդգծելով՝ կան ոլորտներ, որտեղ յոթ-ութ օր հանգիստը խնդիրներ է առաջացնում՝ բանկային ոլորտը, առողջապահական ոլորտը:
«Ես ինքս մի մտահոգություն ունեմ ու կուզեի այս մասին խոսեինք: Դա վերաբերում է հյուրանոցային բիզնեսին: Կարծում եմ՝ կգտնվի այնպիսի դրույթ, որը կհիմնավորի, որ այս օրերն աշխատանքային դարձնելն էական վատթարացում չի բերի տուրիստական գոտիների բիզնեսին: Բայց ես առաջարկում եմ սրա մասին շատ խոսել ու հիմնավորումներն ավելի պատշաճ ներկայացնել, որպեսզի այս լավ օրենքը հասու լինի ՀՀ քաղաքացիներին»,- ասաց ՔՊ-ական պատգամավորը:
«Հայաստան» խմբակցության պատգամավոր Գեղամ Նազարյանն էլ ասաց՝ 4000 զոհ ունենք, և մեռելոցներն էլ հանվում են:
«Դուք ասացիք, որ այս ամենն արվում է, որպեսզի մեր ժողովուրդն աշխատի։ Դուք նկատե՞լ եք, որ մեր ժողովուրդը չափից շատ է աշխատում, թեև համապատասխան եկամուտ չի ստանում։ Մեր ժողովուրդը հանգիստ չունի: Եթե համեմատենք եվրոպական երկրների հետ, այնտեղ տարին երկու անգամ արձակուրդ են գնում, զբաղվում են իրենց հանգստով, իսկ մեզ մոտ ամանորյա տոները առիթ էին գոնե հանգստանալու, ընտանիքով հավաքվելու»,- ասաց Գեղամ Նազարյանը։
ՔՊ պատգամավոր Արսեն Թորոսյանն էլ իր ելույթում ընդգծեց՝ իր համար անհասկանալի է, որ նման պարզ, տարրական, քաղաքակիրթ աշխարհին նմանվելու միտում ունեցող օրենքներում շատ էժան շահարկումներ են արվում և շեշտեց՝ պետք չէ տոների կրճատումը շահարկել և բերել-կապել անգամ քրիստոնեական արժեքների, ավանդույթների հետ։
«Հայաստան» խմբակցության պատգամավոր Գեղամ Նազարյանի ռեպլիկին էլ ի պատասխան, որ Թորոսյանն աթեիստ է, Թորոսյանը չժխտեց:
«Հա, աթեիստ եմ, հարցեր կա՞ն։ Ի տարբերություն շատերի՝ ես չեմ թաքցնում իմ կրոնական պատկանելությունը»,- ասաց պատգամավորը:
