Պաշտոնական Թբիլիսին վերանայել է ռուսաստանյան «Գազպրոմ» ընկերության հետ գործող պայմանագիրը, կողմերը պայմանավորվել են ներմուծվող գազի գինը մոտ 15%-ի չափով նվազեցնելու մասին:
«Հաշվի առնելով մրցակցության աճը եւ այն, որ աշխարհում նավթամթերքի գները անկում են ապրում, մենք այսօր վերանայել ենք «Գազպրոմի» հետ պայմանագիրը, ինչը կնպաստի գազի գնի նվազմանը:
Առեւտրային գաղտնիքից ելնելով՝ ես ձեզ կոնկրետ թվեր չեմ ասի, սակայն կասեմ, որ բնական գազի գինը կնվազի մոտ 15%-ով»,- ասել է Վրաստանի էկոնոմիկայի եւ կայուն զարգացման նախարարը:
2019թ. ապրիլին Վրաստանի էկոնոմիկայի եւ կայուն զարգացման նախարար Գեորգի Կոբուլիան տեղեկացրել էր «Գազպրոմ»-ի հետ փոքր քանակությամբ գազ գնելու շուրջ պայմանագիր կնքելու մասին: 2019-ին Վրաստանը Ռուսաստանից գնել էր 160 մլն կուբամետր գազ, ինչը կազմել էր ընդհանուր ներկրվող գազի մոտ 5%-ը:
2006 թվականից Վրաստանը Ռուսաստանից գազ չի գնել: Երկիրը ստանում էր միայն ռուսական գազի Հայաստան տարանցման ընդհանուր ծավալի 10% -ը: Արդեն 2017 թվականից Ռուսաստանի Դաշնությունը Վրաստանին վճարել է այդ տարանցումը փողերով և մասամբ հումքով, իսկ 2018-ին ՝ միայն փողերով: