Այսօր Երևանի ընդհանուր իրավասության դատարանում՝ դատավոր Աննա Դանիբեկյանի նախագահությամբ, շարունակվեց Ռոբերտ Քոչարյանի և Արմեն Գևորգյանի գործով դատական նիստը։
Արմեն Գևորգյանի պաշտպան Լուսինե Սահակյանը հայտարարեց՝ քանի որ դատարանը արգելել է, որ իր պաշտպանյալը դուրս գա երկրից, Ազգային ժողովի նկատմամբ պարտք է գոյացել։
Նա հայտնեց, որ Արմեն Գևորգյանն Ազգային ժողովի ԵԽԽՎ պատվիրակության անդամ է, պետք է մեկներ Ստրասբուրգ, սակայն դատարանը թույլ չի տվել։ Այդ ընթացքում Արմեն Գևորգյանի հաշվին է փոխանցվել 404 հազար 729 դրամ օրապահիկ։
«Հաշվի առնելով այն հանգամանքը, որ դատարանը Արմեն Գևորգյանին թույլ չի տվել մեկնել տվյալ գործուղմանը, փոխանցված գումարը չի օգտագործվել, ու ԱԺ-ի նկատմամբ առաջացել է պարտք, որը ենթակա է վերադարձման, սակայն այդ հաշվեհամարը գտնվում է արգելանքի տակ»,- ասաց պաշտպանը։
Աննա Դանիբեկյանն արձանագրեց, որ գործի՝ դատաքննության նախապատրաստման փուլում քննության առարկա է դարձվել Գևորգյանի գույքի վրա դրված արգելանքը վերացնելու հարցը, սակայն միջնորդության լուծումը հետաձգվել է՝ մինչև կալանադրված գույքի արժեքը որոշելը, ուստի դատարանը գտնում է, որ սույն միջնորդությունը ներկայացվել է ոչ ժամանակին, հետևաբար այս միջնորդությունը թողնվեց առանց քննության։
Արմեն Գևորգյանն էլ արձագանքեց՝ գումարը պետական միջոցներից է, և եթե այն փոխանցվել է իր հաշվեհամարին և չի օգտագործվել, պետք է վերադարձվի, որովհետև պետական միջոցներ են։
«Վաղը, մյուս օրը, երբ պետական հիմնարկն աուդիտ անցնի, հաշվետվություններ է տալու։ Ի՞նչ են գրելու՝ Աննա Դանիբեկյանը թույլ չտվեց, որ Արմեն Գևորգյանին տրամադրված միջոցները հետ վերադարձվե՞ն: Անհասկանալի իրավիճակ է, լուրջ եմ ասում։ Այս ամենը զավեշտի է վերածվում»,- նշեց Գևորգյանը։
Լուսինե Սահակյանը հայտարարեց, որ 2021 թվականի դեկտեմբերի 1-ին Մոսկվայում նշանակված է ԵԽԽՎ սոցիալական, առողջապահության և կայուն զարգացման հանձնաժողովի լիագումար նիստ, որին պետք է մասնակցի Արմեն Գևորգյանը։ Նա դատարանին խնդրեց վերացնել Արմեն Գևորգյանի սահմանային տեղաշարժի սահմանափակումներն ընդհանրապես կամ նոյեմբերի 30-ից մինչև դեկտեմբերի 3-ն ընկած ժամանակահատվածում։
Սակայն մեղադրող դատախազ Պետրոս Պետրոսյանը հայտարարեց, որ սահմանային տեղաշարժի սահմանափակումները վերացնելու որևէ հիմք չկան: Դատախազի խոսքով՝ միջնորդությունն անհիմն է ու պետք է մերժել այն, քանի որ նիստին հնարավոր է նաև մասնակցել հեռավար։
Դատավոր Աննա Դանիբեկյանն էլ հայտարարեց, որ նոյեմբերի 30-ից դեկտեմբերի 3-ը բացակայելու մասին ասաց՝ ակնհայտ է, որ այդ միջոցառմանը հնարավոր է մասնակցել նաև առցանց եղանակով, հետևաբար դատարանը որոշեց միջնորդությունը մերժել։
Դատարանը փորձեց անցնել մեղադրական եզրակացության եզրափակիչ մասի հրապարակմանը, սակայն պաշտպանը Լուսինե Սահակյանը, ի նշան բողոքի, լքեց դատական նիստերի դահլիճը: Դանիբեկյանն էլ նշեց, որ չի կարող շարունակել դատական նիստը և հաջորդ նիստը նշանակեց հոկտեմբերի 19-ին՝ ժամը 13։00-ին:
