ՀՀ երկրորդ նախագահ Ռոբերտ Քոչարյանը հայտարարեց, որ իշխանափոխության համար պետք են զանգվածային ընդվզումներ, սակայն այսօր ինքը չի տեսնում, որ այդ ընդվզումները հասունացել են:
«Ոչ թե 10 հազար մարդ պետք է լինի, այլ պետք է լինի զանգվածային ընդվզում։ Մենք այսօր չենք տեսնում, որ դա հասունացած է։ Դա հիասթափեցնում է մեր կողմնակիցների մի հատվածին, որոնք պատրաստ են այդ պայքարին, բայց մենք նաև չենք կարող այդ մարդկանց չպատրաստված տանել նման փորձությունների: Ինչ-որ բաներ կան, որ պիտի հասունանան։ Ինքս պատրաստ եմ ամեն ինչի, բայց պետք է զգաս, որ դա լինելու է ոչ թե այսպես ասած՝ ինքնահրկիզման ակտ, այլ լինելու են քայլեր, որոնք մեծ հավանականությամբ պետք է բերեն հաջողության։ Հակառակ դեպքում մեզ մեղադրելու են՝ բա դուք առաջնորդ եք, ինչո՞ւ չեք հաշվարկել»,- ամփոփիչ ասուլիսի ժամանակ ասաց Քոչարյանը:
Երկրորդ նախագահ Ռոբերտ Քոչարյանը նաև հայտարարեց, որ ընդդիմության վարկանիշն է ընկել:
«Ուղղակի, մենք մտածում ենք ու հույս ունենք, որ մեր վարկանիշը վերականգնվող վարկանիշ է, իսկ իշխանության վարկանիշն այսպիսի տեմպերով անկման պարագայում չվերականգնվող է: Մեր գնահատականը սա է»,- եզրափակեց Քոչարյանը: