«Ազատագրական շարժում» նախաձեռնության ներկայացուցիչները բողոքի ակցիա են անցկացնում ՀՀ արտաքին գործերի նախարարության շենքում: «Զարթոնք» ազգային քրիստոնեական կուսակցության նախագահ Արա Զոհրաբյանը նշեց, որ պահանջում են հանդիպում Արտաքին գործերի նախարար Արարատ Միրզոյանի կամ ԱԳՆ ներկայացուցչի հետ, ակնկալելով, որ Միրզոյանը հայտնի ԱԳՆ դիրքորոշումը Արցախի հետագա ճակատագրի վերաբերյալ:
Ավելի ուշ «Կամքի» անդամ Վահագն Չախալյանը վրդովված կերպով սկսեց ոստիկանների հետ բանակցել և իր բողոքները նրանց ներկայացնել: Ոստիկաններից մի քանիսը Չախալյանին հորդորեցին հանգիստ եւ առանց բղավոցների խոսել, վերջինս, չանսալով նրանց հորդորներին, շարունակում էր հուզախառն և ագրեսիվ ելույթը:
Րոպեներ հետո Ոստիկանության աշխատակիցները ներս մտան ԱԳՆ-ի շենք, առաջացան դեպի Չախալյանը՝ նրան բերման ենթարկելու նպատակով, որից հետո հավաքվածների եւ ոստիկանների միջեւ քաշքշուկ սկսվեց: Ոստիկանները ցուցարարներին պահանջեցին դուրս գալ շենքից: Ոստիկանության պահանջը չկատարելու համար բողոքի ակցիա իրականացնող 13 քաղաքացի բերման են ենթարկվել:
ՀՀ ոստիկանությունից «Հայկական ժամանակի»-ին հայտնեցին, որ Վարչական իրավախախտումների վերաբերյալ օրենսգրքի 182 հոդվածով նախատեսված արարք կատարելու համար կա 13 բերման ենթարկված (Ոստիկանության զորքերի զինծառայողի կամ ոստիկանության ծառայողի օրինական պահանջը չկատարելը), որոնց թվում են Նաիրի Հոխիկյանը և Վահագն Չախալյանը:
Այս պահին էլ ոստիկանները ԱԳՆ շենքի տարածում պահպանում են հասարակական կարգը, Ազատագրական շարժման ներկայացուցիչներից ևս անդամներ կան դեռ արտաքին գերատեսչության շենքում: Անվտանգության աշխատակիցներից մեկը նրանց հայտնեց, որ իրենց խնդրանքը փոխանցվել է ԱԳՆ քարտուղարին, խոստացել են, որ շարժման անդամների հետ հանդիպող կլինի:
