Վարչապետ Նիկոլ Փաշինյանը հեռախոսազրույց է ունեցել Ռուսաստանի Դաշնության նախագահ Վլադիմիր Պուտինի հետ։
Քննարկվել է Լեռնային Ղարաբաղում Ռուսաստանի Դաշնության խաղաղապահ զորախմբի պատասխանատվության գոտի ադրբեջանական ստորաբաժանումների ներխուժումից հետո ստեղծված իրավիճակը, որը վարչապետ Փաշինյանը գնահատել է լարված։
Վերջինս հարցադրում է արել տվյալ իրավիճակում ռուս խաղաղապահների գործողությունների հետաքննության անհրաժեշտության մասին և ընդգծել ռուս խաղաղապահների կողմից Ադրբեջանի զինված ուժերը ելման դիրքեր վերադարձնելու պահանջի անհրաժեշտությունը։
Երկու երկրների ղեկավարները պայմանավորվել են ջանքեր գործադրել ԼՂ-ում ստեղծված ճգնաժամային իրավիճակը կարգավորելու ուղղությամբ։
Հայաստանի և Ռուսաստանի միջև դիվանագիտական հարաբերությունների հաստատման 30-ամյակի առթիվ Հայաստանի վարչապետ Նիկոլ Փաշինյանի պաշտոնական այցը ՌԴ նախատեսված է ապրիլի երկրորդ տասնօրյակում, որին կնախորդի ՀՀ ԱԳ նախարար Արարատ Միրզոյանի աշխատանքային այցը: Այն կկայանա ապրիլի 8-ին:
Այս մասին, ըստ ՏԱՍՍ-ի, այսօր հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
Ինչպես հավելել են դիվանագիտական գերատեսչությունից, նախատեսվում է Երևանի կենտրոնում տեղադրել ռուս-հայկական բարեկամության «Դարերի միասնություն» հուշարձանը։
«2022 թվականի ընթացքում Ռուսաստանում կանցկացնենք Հայաստանի մշակույթի օրերը և Հայաստանում կանցկացնենք Ռուսական հոգևոր մշակույթի օրեր: Կանցկացվի հաջորդ երիտասարդական ֆորումը: Նախատեսվում են կլոր սեղաններ ռուս-հայկական հարաբերությունների արդիական հարցերի շուրջ»,- ասել է ԱԳՆ ներկայացուցիչը:
Ավելի մանրամասն տեղեկատվություն կներկայացվի ապրիլի 3-ին:
