Մարտի 15-ից արդեն մեկնարկել են 9-րդ մարդասիրական խմբի աշխատանքները Խանտոման բնակավայրում: Սիրիայի Արաբական Հանրապետության Հալեպ քաղաքում 2019 թվականի փետրվարից մինչև այսօր մաքրվել է 982 661 քմ ականներով և պայթուցիկ զինամթերքով վարակված տարածք: Հայտնաբերվել և վնասազերծվել է մոտ 600 չպայթած զինամթերք: Բժիշկների մեր խումբն օգնություն է ցուցաբերել 42 345 տեղաբնակի։ Այս մասին "Ինտերլուր" լրատվական գործակալությունը տեղեկացավ Հումանիտար Ականազերծման և Փորձագիտական Կենտրոնից:
2022 թվականի մարտի 31-ին Սիրիայի Արաբական Հանրապետության Դամասկոս քաղաքում ՄԱԿ-ի ականազերծման ծառայության գրասենյակում տեղի ունեցավ ականների վտանգի իրազեկման և հակաականային գործունեության աջակցության միջազգային օրվան նվիրված միջացառում։
Միջոցառմանը հատուկ հյուրի կարգավիճակով մասնակցեց Հայաստանի Հանրապետության «Հումանիտար ականազերծման և փորձագիտական կենտրոն» ՊՈԱԿ-ի անձնակազմը, որը ներկայումս Հալեպ նահանգում իրականացնում է ականազերծման, իսկ Դամասկոս նահանգի Դարայա արվարձանում՝ մարտական գործողությունների տարածքի մաքրման աշխատանքներ։ Թիմը ներկայացավ ցուցադրական ձևաչափով, որի ընթացքում հատուկ կահավորված տարածքում ներկայացվեցին «ՀԱՓԿ» ՊՈԱԿ-ի աշխատանքները ՀՀ-ում, ՍԱՀ Հալեպ նահանգում և Դամասկոսում, ինչպես նաև հյուրերին ներկայացվեցին «ՀԱՓԿ» ՊՈԱԿ-ի գործառնությունների ստանդարտ ընթացակարգերով իրականացվող աշխատանքների ընթացքում կիրառվող գործիքները, նշագրման համակարգերը, հանդերձանքները, որոնք հյուրերի շրջանում մեծ հետաքրքրություն առաջացրեցին։ Միջոցառման ընթացքում միջազգային որոշ կազմակերպությունների հետ ձեռք բերվեց պայմանավորվածություն ՍԱՀ-ում հակաականային գործունեության ոլորտում հետագա համագործակցության և փորձի փոխանակման վերաբերյալ։ Միջոցառմանը մասնակցում էին ՍԱՀ հավատարմագրված մի շարք միջազգային կազմակերպություններ, ի մասնավորի Կարմիր Մահիկի, Առողջապահության համաշխարհային կազմակերպության, Նորգեվիայի ժողովրդի աջակցության (NPA), ՄԱԿ-ի ժողովրդագրական զարգացման գործակալության, ՄԱԿ-ի զարգացման ծրագրի, Ագա Խան հիմանդրամի և այլ կազմակերպությունների ներկայացուցիչներ։
Սույն թվականի մարտի 16-17-ը «Հումանիտար ականազերծման և փորձագիտական կենտրոն»-ի (ՀԱՓԿ) տնօրեն Վաղինակ Սարգսյանն այցելել է Սիրիայի Արաբական Հանրապետության Դամասկոսի արվարձանի Դարայա շրջանում իրականացվող «ՀԱՓԿ»-ի ականազերծման խմբին։ Այցի նպատակն էր գնահատել ընթացիկ գործունեությունը և պլանավորել հետագա գործողությունները:
Տնօրենը հանդիպում է ունեցել ծրագրի ղեկավար կազմի, գործառնական անձնակազմի, ինչպես նաև դաշտում աշխատող օպերատորների հետ, ովքեր մաքրման աշխատանքներ են իրականացնում պայթուցիկ զինամթերքով աղտոտված տարածքներում:
2021 թվականի դեկտեմբերի 6-ից ի վեր ենթամակերեսային մաքրման է ենթարկվել ավելի քան 124 300 քմ և մակերեսային մաքրման՝ 330 600 քմ տարածք, ինչպես նաև հայտնաբերվել և նշագրվել է 142 միավոր պայթուցիկ զինամթերք հետագա ոչնչացման նպատակով:
Սիրիա կատարած այցի շրջանակում համակարգման նիստ է տեղի ունեցել Միացյալ ազգերի ականազերծման ծառայության (ՄԱԿԱԾ), Միացյալ ազգերի ծրագրերի իրականացման (ՄԱԿ ԾԻԳ) գլխավոր գրասենյակի պատվիրակության՝ ի դեմս Ծրագրերի, պլանավորման և կառավարման ղեկավար Ստեֆեն Փրիթչարդի, ՄԱԿ ԾԻԳ-ի խաղաղության և անվտանգության փոխտնօրեն Սալման Հաքի, ՄԱԿ ԾԻԳ-ի պորտֆոլիոյի և ՄԱԿԱԾ-ի Սիրիայի արձագանքման ծրագրի ավագ մենեջեր Ջոնաս Գաուդարիի, Հակաականային ծրագրի ղեկավար Ջեիվդ Հաբիբուլհաքի և Գործողությունների ղեկավար Արտյոմ Հարությունյանի հետ համատեղ: Դեկտեմբերի 17-ին ՄԱԿԱԾ-ի և ՄԱԿ ԾԻԳ-ի գլխավոր գրասենյակի պատվիրակությունն այցելել է «ՀԱՓԿ»-ի աշխատանքային տեղամաս, որտեղ այցելուներին ներկայացրել և ծանոթացրել են իրականացված գործունեության հետ:
ՄԱԿԱԾ-ի և ՄԱԿ ԾԻԳ-ի գլխավոր գրասենյակի պատվիրակությունը բարձր է գնահատել «ՀԱՓԿ»-ի ծրագրի ղեկավարության և ականազերծողների իրականացրած հակաականային գործունեությունը:
