Հայկական կողմը ստուգում է լուրերը` արդյո՞ք Թուրքիան Աֆրինից և Ազազից թուրք վարձկաններ է տեղափոխում Ադրբեջան Արցախի դեմ պայքարում ներգրավվելու համար։ Տեղեկությունը լրագրողների հետ ճեպազրույցի ժամանակ ասաց ԱԳՆ խոսնակ Աննա Նաղդալյանը` անդրադառնալով շրջանառվող լուրերին։
«Այս տեղեկությունն իսկապես մտահոգիչ է, և մենք ճշտում ենք դրա իսկությունը։ Հարցն այն է, որ նման վտանգ կարող է սպառնալ»,–ասաց Նաղդալյանը։
Նրա խոսքով` հաշվի առնելով Ադրբեջանի կրոնական ծայրահեղականներին ներգրավվելու և Թուրքիայի` այլ տարածաշրջաններ ահաբեկիչներ մատակարարելու փորձառությունը, ապա Թուրքիան կարող է նման քայլի դիմել։ Նաղդալյանը նշեց, որ այս ամենը նկատի ունենալով էլ Հայաստանը նման հարցերին շատ զգայնությամբ է վերաբերվում։