Այսօր առավոտյան՝ ժամը 10:15-ի սահմաններում, Երեւանի Կոմիտասի պողոտայում երիտասարդ ոստիկան է վրաերթի ենթարկվել:
Նա, հասարակական տրանսպորտից իջնելով, փողոցն անցել է հետիոտնի համար չնախատեսված հատվածով եւ ենթարկվել վրաերթի:
«Հայկական ժամանակ»-ի թղթակցի փոխանցմամբ՝ տղամարդը վնասվածքներ է ստացել հատկապես ոտքերի հատվածում, գիտակցությունը տեղն է եղել:
Ոստիկանին առաջին օգնություն են ցուցաբերել քաղաքացիները, վրաերթի ենթարկող անձն ու այն երթուղայինի վարորդը, որից էլ ոստիկանն իջել ու փողոցն անցել է:
«Շտապբուժօգնություն» ՓԲԸ-ի տնօրեն Թագուհի Ստեփանյանը մեզ հայտնեց, որ տղամարդու վիճակը ծանր չի եղել, վնասվածք է ստացել ոտքի հատվածում: Շտապօգնության մեքենայով նրան տեղափոխել են «Հերացի» թիվ 1 համալսարանական հիվանդանոց:
«Հերացի» թիվ 1 համալսարանական հիվանդանոց էլ հայտնեցին, որ տղամարդը դեռեւս հետազոտման փուլում է:
