ԱՀ նախագահ Արայիկ Հարությունյանը Ֆեյսբուքի իր էջում գրառում է կատարել.
Հարգելի ՛ հայրենակիցներ, այսօր Սարդարապատում մասնակցել եմ տավուշյան հաղթական մարտերում առավել աչքի ընկած զինծառայողների պարգևատրման հանդիսավոր արարողությանը:
Խորհրդանշական վայրում մեր զինծառայողները բարձր պարգևներ ստացան՝ որպես հայ ժողովրդի տված յուրահատուկ գնահատական իրենց մատուցած ծառայություններին: Սակայն օրն առանձնահատուկ էր այլ հատկանշական իրադարձությամբ. կապիտան Ռուբեն Սանամյանն արժանացավ Ազգային հերոսի մեծ պատվին՝ Հայրենիքի պաշտպանության ու անվտանգության ապահովման գործում ցուցաբերած բացառիկ արիության, անձնուրացության և խիզախության համար:
Ռուբենը հայի հավաքական կերպարն է, նրա անպարտելի ոգին, որ հաղթանակում է միշտ: Այո՛, նա իր կենդանի ներկայությամբ նաև օրինակ է ապրող և գալիք սերունդների համար:
Փա՛ռք Հայոց Բանակին, փա՛ռք հայ ժողովրդին, որ առյուծներ է ծնում:
