Հայոց Ցեղասպանութան ժխտողականությունը և անպատժելիությունը, իրապես, բերել են հաջորդ ժամանակահատվածներում ցեղասպան գործողությունների կրկնություններին։
Այս մասին «Արցախպրես»-ի թղթակցի հետ զրույցում ասել է ԱՀ Մարդու իրավունքների պաշտպան Գեղամ Ստեփանյանը։
«Հայ ժողովուրդը ականատես է եղել ցեղասպանական գործողությունների 20-րդ դարավերջին, երբ ադրբեջանական իշխանությունների կողմից տարբեր քաղաքներում իրականացվել են ցեղասպանական գործողություններ, նման գործողությունների ամենավառ ապացույցներից է նաև 2020 թվականի ադրբեջանաթուրքական ագրեսիան։ Եվ որպեսզի ավելի հստակ տեսնենք, որ տեղի ունեցողը Հայոց Ցեղասպանության ուղիղ շարունակությունն է, բավարար է նայել, թե ինչպիսի գաղափարախոսություն է եղել դրված 1915 թվականի Հայոց Եղեռնի և 2020 թվականի ագրեսիայի տակ։ Դա հայատյացությունն է՝ թեքված ամբողջությամբ հայերի նկատմամբ անհանդուրժողականության, խտրականության վրա»,-նշել է Գ. Ստեփանյանը։
Նրա խոսքով` այդ ամենը միջազգային հանրության տոտալ անտարբերության արդյունքն է։
«Ցեղասպանությունները կանխելու միակ տարբերակը ցեղասպանին դատապարտելն ու նրան պատժի ենթարկելն է, որը հայոց ցեղասպանության պարագայում մենք չտեսանք, և այդ է պատճառը, որ այն այսօր կրկնվում է։ Վերջին ժամանակներում միջազգային տարբեր պաշտոնյանների հետ հանդիպումների ժամանակ ես նրանց ուղիղ հարց եմ տալիս` արդյո՞ք նրանք ստանում են ԱՀ Մարդու իրավունքների պաշտպանի պատրաստած զեկույցները, և ստանում եմ պատասխանը` «այո»։ Այս առումով ես վստահ եմ, որ նրանք ստանում են բոլոր զեկույցները, բայց, ցավոք սրտի, միշտ չէ, որ այդ մշակված մեխանիզմները ծառայում են իրենց նպատակին, և շատ հաճախ մարդու իրավունքների պաշտպանի օրակարգը ստորադասվում է պետությունների աշխարհաքաղաքական շահերին»,-ընդգծել է ԱՀ Մարդու իրավունքների պաշտպանը։