Այսօր ՀՀ վարչական դատարանում տեղի ունեցավ ՀՀ բռնցքամարտի ֆեդերացիայի ընդդեմ ՀՀ կրթության, գիտության, մշակույթի և սպորտի նախարարության՝ ֆեդերացիայի ֆինանսավորումը կասեցնելու վերաբերյալ հրամանն անվավեր ճանաչելու պահանջի մասին առաջին նիստը:
Ինչպես իր ֆեյսբուքյան էջում նշում է բռնցքամարտի ֆեդերացիայի նախագահ Արթուր Գևորգյանը, դժվար է պատկերացնել, որ երբևէ նախարարությունը կարող էր նման չկողմնորոշված և անձեռնհաս վարքագիծ դրսևորել :
«Նախարար Ա.Հարությունյանը մի տարօրինակ դիմում էր ներկայացրել դատարան, որով խնդրել էր դատական նիստը հետաձգել, քանի որ ցանկանում է գործի նյութերին ծանոթանալ:
Իսկ նման դիմում ներկայացնելու տարօրինակությունը առավելապես կայանում է նրանում, որ
- այդ գործի նյութերը հայցադիմումին կից 2019 թվականի ապրիլ ամսին հանձնվել են նախարարություն ,
- այդ նյութերն ընդհանուր առմամբ երկուսն են, մեկը նախարարի հրամանը, մյուսը՝ նախարարության և ֆեդերացիայի միջև ֆինանսավորման պայմանագիրը :
- արդյոք 5 ամիսը բավարար չէր նախարարին, որպեսզի դատական գործի նյութերին ծանոթանար:
Այս ամենից կարելի է եզրակացնել, որ նախարար Արայիկ Հարությունյանը ցանկանում է գալ դատարան ծանոթանալ իր կողմից տրված հրամանին, երևի մինչ այժմ չի պատկերացնում ինչ է կատարվում:
Դիմում ենք սպորտի նախարարության աշխատակիցներին, Ձեր նախարարը ցանկանում է դատարան ներկայանալ, որպեսզի ծանոթանա նախարարի հրամանին, այդ իսկ պատճառով խնդրում ենք այդ հրամանը ներկայացնել նախարարին, որպեսզի վերջինս ծանոթանա իր հրամանին»,- նշում է Գևորգյանը:
