Օրը խորհրդին համապատասխան են սկսել երևանի թատրոնի և կինոյի պետական ինստիտուտում:
Ինստիտուտի ռեկտորի պաշտոնակատար Լիլիթ Արզումանյանը տեսանյութ է հրապարակել Ֆեյսբուքի իր էջում, որում երևում է՝ ինչպես են ինստիտուտի ուսանողուհիները շուրջպար բռնել հայկական երաժշտության հնչյունների ներքո:
Տեսանյութին կից՝ Արզումանյանը կատարել է հետևյալ գրառումը. «Այսօր Պարի միջազգային օրն է. Մեր ինսիտուտում օրն այսպես սկսվեց»:
Տոնի խորհրդի առթիվ ՀՀ ԿԳՄՍ նախարար Վահրամ Դումանյանը հանդիպել է պարարվեստի ոլորտի նվիրյալների հետ, շնորհավորել մասնագիտական տոնի կապակցությամբ:
Այս մասին տեղեկացնում են ՀՀ ԿԳՄՍՆ-ից:
«Ջերմորեն շնորհավորում եմ բոլորիդ մասնագիտական տոնի առթիվ, մաղթում ստեղծագործական նոր ներշնչանքներ, բազում բեմեր, լեփ-լեցուն դահլիճներ և ծափերի տեղատարափ»,- նշել է նախարարը և կարևորել պարարվեստի անզուգական դերակատարումը մարդու կյանքում:
ՀՀ ԿԳՄՍ նախարար Վահրամ Դումանյանի հրամանով՝ Պարի միջազգային օրվա կապակցությամբ պարարվեստի ոլորտում երկարամյա աշխատանքային գործունեության համար Ելենա Պավլիդին (Ա. Սպենդիարյանի անվան օպերայի և բալետի ազգային ակադեմիական թատրոնի բալետային խմբի փորձավար), Նարեկ Հարությունյանը (Հայաստանի պարի պետական անսամբլի պարող), Փայլակ Սարգսյանը (Մայր Աթոռ Սբ Էջմիածնի և ՀԲԸՄ Նորքի հայորդյաց տան «Նարեկ» պարային դպրոցի հիմնադիր, բալետմայստեր) պարգևատրվել են Հայաստանի Հանրապետության կրթության, գիտության, մշակույթի և սպորտի նախարարության Ոսկե մեդալով:
Պարգևը հանձնել է ԿԳՄՍ նախարար Վահրամ Դումանյանը:
Ներկաները շնորհակալություն են հայտնել բարեմաղթանքների, ոլորտի առաջնահերթությունը կարևորելու և գնահատանքի համար:
Պարի միջազգային օրվա առթիվ Երևանի քաղաքապետ Հրաչյա Սարգսյանը հյուրընկալել է պարարվեստի մի շարք գործիչների:
Շնորհավորելով մասնագիտական օվա առթիվ՝ քաղաքապետը շնորհակալություն է հայտնել մշակույթի նվիրյալներին՝ իրենց արվեստով երկրի ու մայրաքաղաքի պատիվը մշտապես բարձր պահելու համար:
«Պարը մարդկային հույզերի ամենաանկեղծ վկան ու փոխանցողն է, մեր ինքնության խտացումը: Իսկ հայկական պարը՝ մեր հավաքական կերպը, որը բազմաթիվ թելերով կապված է ազգային ավանդույթների, ծեսերի և մեր պայքարի հետ»,-նշել է քաղաքապետը:
Պարի միջազգային օրվա առթիվ պարարվեստի բնագավառում ունեցած նշանակալի ավանդի և բարձր վարպետության համար` «Հայաստանի պարի պետական անսամբլ»-ի գլխավոր բալետմայստեր Ասատուր Կարապետյանը և «Ա.Սպենդիարյանի անվան օպերայի և բալետի ազգային ակադեմիական թատրոն»-ի պարուսույց Ելենա Պավլիդինը պարգևատրվել են Երևանի քաղաքապետի ոսկե մեդալով:
Ա. Սպենդիարյանի անվան օպերայի և բալետի ազգային ակադեմիական թատրոնի գլխավոր բալետմայստերի օգնական, բալետի արտիստ Սերգեյ Սաֆարյանն ու «Թ.Ալթունյանի անվան երգի-պարի պետական համույթ»-ի պարող Գոռ Գալուստյանն էլ արժանացել են Էրեբունի Երևան 2800-ամյակի հուշամեդալի: Պարարվեստի մի շարք գործիչներ էլ պարգևատրվել են Երևանի քաղաքապետի պատվոգրով: