Վարչապետ Նիկոլ Փաշինյանը տիկնոջ՝ Աննա Հակոբյանի, դուստրերի հետ այցելել է Կարեն Դեմիրճյանի անվան մարզահամերգային համալիր, հետևել Հայաստանի հավաքականի անդամ, 86 կգ քաշային Ռաֆայել Հովհաննիսյանի եզրափակիչ մենամարտին:
Մարզահամերգային համալիրում էին նաև փոխվարչապետ Համբարձում Մաթևոսյանը, ՀՀ վարչապետի աշխատակազմի ղեկավար Արայիկ Հարությունյանը, ԱԺ փոխնախագահ Հակոբ Արշակյանը, կառավարության անդամներ և այլ պաշտոնատար անձինք:
Եզրափակիչում Ռաֆայել Հովհաննիսյանը պարտվել է վրացի մրցակցին և արժանացել Եվրոպայի առաջնության արծաթե մեդալի: 86 կգ քաշային կարգի մրցանակակիրներին պարգևները հանձնել է անձամբ վարչապետ Փաշինյանը:
Հայաստանի հավաքականի կազմում Երևանում անցկացված Եվրոպայի առաջնությունում չեմպիոն է դարձել Հովհաննես Բաչկովը, արծաթե մեդալներ են նվաճել Ռաֆայել Հովհաննիսյանը և Արթուր Բազեյանը։ Նարեկ Մանասյանը դարձել է բրոնզե մեդալակիր:
Մրցանակակիր մարզկիներին պարգևներ են հանձնել նաև Համբարձում Մաթևոսյանը և Արայիկ Հարությունյանը:
ՀՀ վարչապետ Նիկոլ Փաշինյանը ֆեյսբուքյան էջում տեսանյութ է հրապարակել Բռնցքամարտի Հայաստանի հավաքականի անդամների մենամարտերից` կից գրելով.
«Ընտանիքով այցելել էինք Մարզահամերգային համալիր՝ հետևելու բռնցքամարտի Հայաստանի հավաքականի անդամ Ռաֆայել Հովհաննիսյանի եզրափակիչ մենամարտին:
Շնորհավորում եմ Երևանում անցկացված Բռնցքամարտի Եվրոպայի առաջնությունում մեր հավաքականի կազմում չեմպիոն հռչակված Հովհաննես Բաչկովին, արծաթե մեդալակիրներ՝ Ռաֆայել Հովհաննիսյանին, Արթուր Բազեյանին և բրոնզե մեդալակիր Նարեկ Մանասյանին:
Շնորհակալություն եմ հայտնում մեր երկիրը լավագույնս ներկայացնելու համար»: