Հայաստանի և Ադրբեջանի միջև հարաբերությունների կարգավորման հարցերով Ռուսաստանի արտգործնախարարի հատուկ ներկայացուցիչ Իգոր Խովաևը Բաքվում հանդիպել է Ադրբեջանի նախագահ Իլհամ Ալիևի հետ։
Հիշեցնենք, որ օրերս Խովաևը խորհրդակցություններ է անցկացրել Երևանում:
«Իգոր Խովաևի հիմնական խնդիրներից է ադրբեջանցի և հայ գործընկերներին աջակցել խաղաղության համաձայնագրի նախապատրաստման գործում։ Հատուկ ներկայացուցիչն արդեն ակտիվորեն միացել է աշխատանքին, օգտակար խորհրդակցություններ է անցկացրել Երևանում։ Համաձայնեցված է նրա այցը Բաքու, որը տեղի կունենա մոտ ապագայում», - ասել էր ՌԴ ԱԳՆ պաշտոնական ներկայացուցիչ Մարիա Զախարովան։
Նա նշել էր, որ երկխոսությունը հիմնված է Ադրբեջանի և Հայաստանի միջև միջպետական հարաբերությունների հաստատման համար Բաքվի առաջարկած հիմնարար սկզբունքների, ինչպես նաև այդ առաջարկներին Երևանի կառուցողական արձագանքի վրա։
«3 + 3» պլատֆորմի երկրորդ հանդիպման նախապատրաստական աշխատանքները շարունակվում են, նաևՎրաստանի համար դռները բաց են կողմերի համաձայնությամբ, «ՌԻԱ Նովաստի»-ին տված հարցազրույցում ասել է ԱՊՀ երկրների չորրորդ դեպարտամենտի տնօրեն Դենիս Գոնչարը։
«3 + 3» խորհրդատվական տարածաշրջանային պլատֆորմի առաջին հանդիպումը՝ Ռուսաստանի Դաշնության, Ադրբեջանի, Հայաստանի, Թուրքիայի փոխարտգործնախարարների և Իրանի ԱԳՆ գլխավոր տնօրենի համանախագահությամբ, տեղի է ունեցել 2021 թվականի դեկտեմբերին Մոսկվայում։ Ավելի վաղ Վրաստանի ԱԳՆ-ն հաստատել էր, որ Թբիլիսին հրաժարվում է մասնակցել տարածաշրջանային խորհրդատվական մեխանիզմին։
«Ներկայումս նախապատրաստական աշխատանքներ են տարվում 3+3 խորհրդատվական տարածաշրջանային պլատֆորմի երկրորդ հանդիպման համար, անցկացման վայրն ու ժամը կհայտարարվեն», — ասել է Գոնչարը։
«Վստահ եմ, որ «3+3»-ի օրակարգը լիովին համապատասխանում է Վրաստանի շահերին, ինչի համար «դռները»՝ բոլոր մասնակից երկրների ընդհանուր համաձայնությամբ, մնում են բաց»,- ընդգծել է դիվանագետը։
Մոսկվան ճիշտ է համարում ակտիվորեն օգտագործել «3+3»-ը՝ Հարավային Կովկասի երկրների և նրանց հարևանների միջև համագործակցությունը զարգացնելու համար, ասել է Գոնչարը՝ հավելելով, որ նման համագործակցությունը ենթադրում է հարցերի կոլեկտիվ դիտարկում, չի սրում քաղաքական հակասությունները, այլ ընդհակառակը, նպաստում է փոխադարձ վստահության բարձրացմանը։
Նրա խոսքով, առաջնահերթ ուղղություններն են փոխշահավետ նախագծերի իրականացումն առևտրի, էներգետիկայի, արդյունաբերության, նորարարական տեխնոլոգիաների, ենթակառուցվածքների արդիականացման ոլորտներում։
