Վրաստանի վարչապետ Գիորգի Գախարիան այսօր կայացած ճեպազրույցի ժամանակ հայտարարել է, որ հրաժարականի որոշում է կայացրել՝ փոխանցում է РБК-ն:
«Ես հավատում եմ և ուզում եմ հավատալ, որ այս քայլը կօգնի նվազեցնելու մեր երկրում քաղաքական տարածության բևեռացումը»,- նշել է Վրաստանի կառավարության ղեկավարը:
Վրաստանի իշխող «Վրացական երազանք» կուսակցությունը վարչապետի պաշտոնի թեկնածու կառաջադրի փետրվարի 19-ին: Այս մասին ճեպազրույցի ժամանակ հայտարարել է կուսակցության նախագահ Իրակլի Կոբախիձեն:
«Ենթադրվում է, որ վաղը կհավաքվի քաղխորհուրդը, և կառաջադրվի վարչապետի թեկնածու: Որոշումը կկայացվի վաղը»,- նշել է Կոբախիձեն:
Ի դեպ, Բաքվում փետրվարի 19-ին կայանալիք Ադրբեջանի, Վրաստանի եւ Թուրքիայի արտգործնախարարների եռակողմ հանդիպումը հետաձգվել է: Ինչպես տեղեկացնում են վրացական լրատվամիջոցները, Վրաստանի արտաքին գործերի նախարար Դավիթ Զալկալիանիի այցը Բաքու հետաձգվել է վարչապետ Գեորգի Գախարիայի հրաժարականի պատճառով: