Երեկ Արաբկիրի վարչական շրջանում «Քաղաքացիական պայմանագիր» կուսակցության անդամների և տեղի բնակիչների միջև միջադեպ է տեղի ունեցել: Մի խումբ բնակիչներ ովքեր ոգելից խմիչքի ազդեցության տակ են եղել մոտեցել են ՔՊ անդամներին, և փորձել խոչընդոտել քարոզարշավի ընթացքին, ինչի պատճառով կողմերի միջև ծեծկռտուք է տեղի ունեցել, կան տուժածներ:
Ըստ մամուլում տարածված տեղեկությունների՝ ՔՊ-ականները՝ ԲՏԱ նախկին նախարար Հակոբ Արշակյանի գլխավորությամբ «Քանաքեռ ՀԷԿ»-ի տարածքում են իրականացրել քարոզարշավ, եւ որ միջադեպի հետեւանքով ՔՊ-ականները հայտնվել են «Իզմիրյան» ԲԿ-ում տարբեր վնասվածքներով:
ՀԺ-ի հետ զրույցում ՔՊ մամուլի խոսնակ Վահագն Ալեքսանյանը հաստատեց, որ միջադեպ տեղի է ունեցել, բայց այլ՝ ելքով:
«Հակոբ Արշակյանը, մոտ 4-5 ՔՊ-ականների հետ քարոզարշավ են իրականացրել Արաբկիր վարչական շրջանում: Տարածքում եղել է զրուցարան, որտեղ տարբեր տարիքի մարդիկ են եղել: Նրանցից մեկը բոլոր քաղաքական ուժերի հասցեին հայհոյանքներ է տվել: ՔՊ-ականները փորձել են բացատրել, որ չի կարելի այդպիսի արտահայտություններ անել և պետք է մնալ կոռեկտության սահմաններում: Դրանից հետո ՔՊ-ականներին է մոտեցել մոտ 10 հարբած երիտասարդ ովքեր փորձել են խոչընդոտել քարոզարշավը: ՔՊ-ականները սաստել են նրանց և այդ 10 հոգուց ոմանք հայտնվել են հիվանդանոցում՝ տարբեր աստիճանների վնասվածքներով»:
Ալեքսանյանի խոսքով՝ ՔՊ-ականներից ոչ ոք չի տուժել:
Հարցին՝ դեպքի առնչությամբ ՔՊ-ականները հրավիրվե՞լ են ոտիկանություն, խոսնակն ասաց՝ տեղյակ չէ:
Ոստիկանությունից փոխանցեցին, որ սույն միջադեպի առնչությամբ հարուցվել է քրեական գործ: Քննչական կոմիտեում նախաքննություն է ընթանում:
Քննչական կոմիտեից էլ փոխանցեցին, որ քրեական գործի մանարամասները կհայտնեն ավելի ուշ:
